އާސަންދަ ބަނގުރޫޓޫވެ ކްލިނިކްތަކަށް ފައިސާ ނުދެވި ކްލިނިކްތަކުން އާސަންދައަށް ހިދުމަތް ދިނުން ހުއްޓާލައިފި، ޗައިލްޑް ތެރަޕީ ދޭ މަދު ތަންތަންވެސް ހިމެނޭ

މިދިޔަ 9 މަސްދުވަހުގެ ތެރޭގައި އާސަންދައިން ގިނަ ކްލިނިކްތަކަކަށް ދޭންޖެހޭ އެތައް ސަތޭކަ މިލިއަން ރުފިޔާއެއް ނުދެވުމުގެ ސަބަބުން، އެ ކްލިނިކްތަކުން އާސަންދައަށް ޚިދުމަތް ދިނުން ވަނީ ހުއްޓާލާފައެވެ. މީގެ ތެރޭގައި މަޝްހޫރު އީވް ކްލިނިކާއި ކުޑަކުދިންނަށް އެކިއެކި ތެރަޕީ ދޭ ޗައިލްޑް ޑިވެލޮޕްމަންޓް ކްލިނިކްވެސް ހިމެނެއެވެ.

އީވް ކްލިނިކުން އާސަންދަ ހުއްޓާލައިފި

ޗައިލްޑް ޑިވެލޮޕްމަންޓް ކްލިނިކުން ދޭ ޚިދުމަތްތަކަކީ ސަރުކާރު ހޮސްޕިޓަލްތަކުން ނުވެސް ލިބޭ ޚިދުމަތްތަކެކެވެ. މިކަމާ ގުޅިގެން ޚާއްޞަ އެހީއަށް ބޭނުންވާ ކުދިންގެ މައިންބަފައިންނަށް ވަނީ އެތައް ތަކުލީފުތަކަކާ ކުރިމަތިލާން ޖެހިފައެވެ.

ޗައިލްޑް ޑިވެލޮޕްމަންޓް ކްލިނިކުންވެސް އާސަންދައަށް މިހާރު ހިދުމަތެއް ނުދޭ

މި ސަރުކާރު އައުމަށްފަހު ބާރު ސްޕީޑުގައި ހިނގަމުންދަނީ ޤައުމު ބަނގުރޫޓުވުމުގެ ޕްރޮޖެކްޓެއް ކަމަށް ބެލެވެއެވެ. ރައްޔިތުންނަށް ޚިދުމަތް ދޭން ހުރި ފައިސާ ތަޅާ ބުރުވަނީ 3000 ސިޔާސީ މުވައްޒަފުންގެ މުސާރަ ދިނުމުގައި ކަމަށް ބުނެވެއެވެ.

މިކަމުގެ ސަބަބުން ގިނަ ކްލިނިކްތަކެއް ވަނީ ބަނގުރޫޓުވުމާ ގާތުގައެވެ. އަދި މިކަމުގެ އަސަރު ރައްޔިތުންނަށް ކުރަމުންދާކަން ފާހަގަކުރެވެއެވެ. ޚާއްޞަކޮށް ޚާއްޞަ އެހީއަށް ބޭނުންވާ ކުދިންނަށް ބޭނުންވާ ޚިދުމަތްތައް ނުލިބި، އެ ކުދިންގެ މައިންބަފައިންނަށް ދަތިތަކާ ކުރިމަތިލާން ޖެހިފައިވާކަން ފާހަގަކުރެވެއެވެ.