ސިހުރުހަދާ ދެ އަންހެނުންގެ ބަހުން ޔާމީނު އާރަށު މޫދަށް: 200 މިލިއަން ރުފިޔާގެ ސިއްރު ފައިސަލް ހާމަކުރައްވައިފި

ޓޫރިޒަމް މިނިސްޓަރ އިބްރާހިމް ފައިސަލް، ރޭ ބޭއްވި ޕްރޮގްރެސިވް ނޭޝަނަލް ކޮންގުރެސް (ޕީއެންސީ) ޖަލްސާގައި ވާހަކަފުޅު ދައްކަވަމުން، ކުރީގެ ރައީސް އަބްދުﷲ ޔާމީން އަބްދުލްޤައްޔޫމަށް ހަރުކަށި އިބާރާތުން ފާޑުވިދާޅުވެއްޖެއެވެ.

އެގޮތުން ފައިސަލް ވިދާޅުވީ، " ދެ އަންހެނުން ބުނެގެން އާރަށުގައި ކަރުތާފެނަން މޫދަށް އެރިނީ ޔާމީނު" ކަމަށެވެ. އަދި 2018 ވަނަ އަހަރުގެ ރިޔާސީ އިންތިޚާބުން ބަލިވުމުގެ ޒިންމާވެސް ނަގަންޖެހޭނީ އެމަނިކުފާނު ކަމަށާއި، ވިޔަފާރިވެރިން ދިން 200 މިލިއަން ރުފިޔާ ވީ އަމިއްލަ އެކައުންޓުގައި ކަމަށް ބުނެ ބޮޑު ތުހުމަތެއް ކުރައްވާފައިވެއެވެ.

ފައިސަލް އިތުރަށް ވިދާޅުވީ، ރައީސް ޔާމީނަކީ ކިތަންމެ ބޮޑު އިކޮނޮމިސްޓެއް ކަމަށްވިޔަސް، މި ގައުމު ބަނޑަށް ނުޖެހޭނެ ކަމަށާއި ރައީސް މުޢިއްޒު މި ގައުމު ސަލާމަތް ކުރާނެ ގާބިލުކަން އެބަހުރި ކަމަށެވެ. މިހެން ފައިސަލް ވިދާޅުވީ ރައީސް ޔާމީނު މި ގައުމުގެ މާލީ ހާލަތު ދައްކާ ގޮތުން މިދަނީ ދަތި ދުވަސްތަކެއް އަންނަން ކަމަށް ބުނުމުންނެވެ.

ފައިސަލް ވިދާޅުވީ، ފިނި ކޮޓަރީގައި އިނދެގެން މާމޮޅު އިކޮނޮމިސްޓަކަށްވެގެން އެހެން މީހުންގެ ބޮލުގައި ސިހުރު ހާހޫރަގެ ކަންތައް އަޅުވަމުން ދާނަމަ، އަނގަމަޑުން ލައިގެން ތިމާމެންވެސް ނުތިބޭނެ ކަމަށެވެ. މިއީ ރައީސް ޔާމީނާ ދިމާލަށް ދެއްވި ރައްދެކެވެ.

މީޑިއާ ރިޕޯޓުތަކުން ބުނާ ގޮތުގައި ރައީސް ޔާމީނުގެ އެކައުންޓުގައި 195 މިލިއަން ރުފިޔާ އެބަހުރި ކަމަށާއި، ނަމަވެސް މިއީ ކިހިނެއް ހޯދި ފައިސާއެއްކަން އިނގޭނެ ގޮތެއް ނެތްކަން ފާހަގަކުރެވޭ!