މި ސަރުކާރުގެ ވެރިންނަކީ ޑިމޮކްރަސީއަށް އިޚްތިރާމްކުރާ ބައެއް ނޫން، މިއީ ޚުދުމުހުތާރު ވެރިކަމެއް: ޝާހިދު

މިއަދުގެ ސަރުކާރާއި ސަރުކާރުގެ އިސްމަގާމުތަކުގައި ތިއްބެވި ބޭފުޅުންނަކީ ޑިމޮކްރަސީއަށް އިޚްތިރާމްކުރާ ބައެއް ނޫން ކަމަށް ވިދާޅުވެ، އިދިކޮޅު އެމްޑީޕީގެ ރައީސް އަބްދުﷲ ޝާހިދު ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

ޝާހިދު މިހެން ވިދާޅުވީ، އިންތިޚާބުތައް އެއްކުރުމާ ދެކޮޅަށް "އިންތިޚާބުތައް އެއްކުރުމަށް ނޫނެކޭ" މި ނަމުގައި އެމްޑީޕީ ހަރުގޭގައި ސިލްސިލާކޮށް ކުރިއަށް ގެންދިއުމަށް ފެށި ޖަލްސާގައި ވާހަކަ ދައްކަވަމުންނެވެ.

މި ޖަލްސާގައި ވާހަކަ ދައްކަވަމުން ޝާހިދު ވިދާޅުވީ، އަޑު ހަރުކޮށް ކިތައްމެ ބާރަށް ވިދާޅުވިޔަސް، މިއަދު މިއޮތް ސަރުކާރަކީ އަދި ސަރުކާރުގެ ވެރިންނަކީ ޑިމޮކްރަސީއަށް އިޚްތިރާމް ކުރާ، ބޯލަނބާ، ނުވަތަ ޑިމޮކްރަސީ ކުރިއަރުވަން އުޅޭ ބައެއް ނޫން ކަމަށެވެ. މިއަދުގެ ސަރުކާރަކީ ޚުދުމުހުތާރު ވެރިކަމެއް ގާއިމުކުރަން މަގުކޮށަމުންދާ އަނިޔާވެރި ޖައްބާރު ސަރުކާރެއްގެ ގޮތުގައި ޝާހިދު ވަނީ ސިފަކުރައްވާފައެވެ.

ޝާހިދު އިތުރަށް ވިދާޅުވީ، މިހާރުގެ ނިޒާމު ގަޑުބަޑުކޮށް ފުނޑާލުމަށްޓަކައި ސަރުކާރުން ހީލަތްތެރި ރޭވުންތަކެއް ރާވަމުންދާ ކަމަށެވެ. އަދި އެކަންކަން އެގޮތަށް ވާން ދިވެހި ރައްޔިތުން ދޫކޮށްލާނެ ކަމަށް ރައީސް ޑރ. މުޙައްމަދު މުޢިއްޒު ހީފުޅުކުރައްވާނަމަ އެއީ ވަރަށް ބޮޑު ކުށްހީއެއް ކަމަށްވެސް އޭނާ ވިދާޅުވިއެވެ.

ރާއްޖޭގެ ތަރައްޤީގެ މަޝްރޫޢުތަކާ ގުޅޭގޮތުން ވާހަކަ ދައްކަވަމުން ޝާހިދު ވިދާޅުވީ، މި ސަރުކާރުން ކުރިއަށް ގެންދާ އެއްވެސް ޕްރޮޖެކްޓެއް ރާއްޖޭގެ އެއްވެސް ރައްޔިތަކަށް ފެންނަން ނެތް ކަމަށާއި، ރަށްރަށް ދަނީ ވީރާނާވެ ފަނާވަމުން ކަމަށެވެ. މިހިސާބަށް ކަންކަން ދިއުމުން، ކުރިއަށް އޮތް އިންތިޚާބުގައި ރައީސް މުޢިއްޒަށް "ނޫނެކޭ" ބުނަންޖެހޭ ކަމަށާއި، މި ސަރުކާރު ބަލިކުރާނެ ކަމަށްވެސް އޭނާ ވިދާޅުވިއެވެ.

އެމްޑީޕީގެ ރައީސް ވިދާޅުވީ ދިވެހި ރައްޔިތުންނަށް އުފާވެރި މާދަމާއެއް ހޯދައިދެވޭނީ ހަމައެކަނި އެމްޑީޕީގެ ސަރުކާރަކަށް ކަމަށެވެ. އެގޮތުން އެންމެ ފުރަތަމަ ފިޔަވަޅަކީ ކުރިއަށް މިއޮތް ލޯކަލް ކައުންސިލް އިންތިޚާބުގައި މި ސަރުކާރު ބަލިކުރުން ކަމަށް އޭނާ ފާހަގަކުރެއްވިއެވެ. އަދި އިންތިޚާބުތައް އެއްކުރުމަށް ނަގާ ފެންނަ ނުފެންނަ ވޯޓުން، ރައްޔިތުން މި ސަރުކާރާ މެދު ރުހިގެން ނެތްކަން ހާމަކޮށްދޭނެ ކަމަށްވެސް ޝާހިދު ވިދާޅުވިއެވެ.