ބާބުލްއަވާލީ ސަލަފުން އިޒްރޭލާއި އެމެރިކާއަށް ތާއީދުކުރާކަމުގެ ތުހުމަތާއެކު ބޮޑު ބަހުސެއް ފެށިއްޖެ

ބާބުލްއަވާލީ ސަލަފީ ފިކުރުގެ މީހުން އިޒްރޭލާއި އެމެރިކާއަށް ތާއީދުކުރާ ކަމަށް ބުނެ، ދީނީ އަދި ސިޔާސީ މައިދާނުގައި ބޮޑެތި ފާޑުކިއުންތަކެއް އަމާޒުވާން ފަށައިފިއެވެ. މި ބަހުސް ހޫނުވެފައިވަނީ ބާބުލްއަވާލީގެ ވެރިކަމުން އިރާނުން އިޒްރޭލަށް ދިން ރައްދު ހަމަލާ ކުއްވެރިކޮށް، ނަމަވެސް އިޒްރޭލުން ދެމުންދާ ހަމަލާތައް ކުއްވެރިކުރަން ދެކޮޅު ހެދުމާ ގުޅިގެންނެވެ.

މިކަމާ ގުޅޭގޮތުން ދިރާސާކުރާ ފަރާތްތަކުން ފާހަގަކުރާ ގޮތުގައި، ވައްހާބީ ފިކުރުގެ މީހުން ގަބޫލުކުރާ ގޮތުގައި ޝީއީންނަކީ އިސްލާމްދީނުން ބޭރުވެފައިވާ މުރުތައްދުންނެވެ. އަދި އެއީ މާތް الله އަށް ކުރާ އަޅުކަމުގައި ޝަރީކުކުރާ ބައެއް ކަމަށް އެމީހުން ދެކެއެވެ. އިސްލާމްދީނުގައި ފޮތުގެ އަހުލުވެރިން (ޔަހޫދީންނާއި ނަސާރާއިން) އަކީ މުޝްރިކުންނަށްވުރެ މުސްލިމުންނާ ގާތް ބައެއް ކަމަށް ބަލައި، ޝީއީންނަކީ މުރުތައްދުން ކަމަށް ކަނޑައެޅުމަށްފަހު، އެމީހުންގެ ތާއީދު އިޒްރޭލަށް އޮންނަ ކަމަށް ބުނެވެއެވެ.

މި ތާރީޚީ ގަބޫލުކުރުމަކީ އުސްމާނީ ޚިލާފަތާ ދެކޮޅަށް ވައްހާބީން ކުރި ހަނގުރާމައިގައިވެސް ފެނިގެންދިޔަ ކަމެކެވެ. އެ ދުވަސްވަރު އުސްމާނީން ތަކްފީރުކުރުމަށްފަހު، ނަސާރާ އިނގިރޭސިންނާ ބައިއަތު ހިފައިގެން އުސްމާނީންނާ ދެކޮޅަށް ހަނގުރާމަކޮށް، ބައިތުލްމަގްދިސް މުސްލިމުންގެ އަތުން ބީވެގެންދިއުމަށް މަގުފަހިވިއެވެ. ފާޑުކިޔާ ފަރާތްތަކުން ބުނާ ގޮތުގައި ވައްހާބީ ފިކުރު ފާޅުވި ފަހުން އިސްލާމީ އުންމަތް އޮންނަނީ ގައިރު މުސްލިމުންގެ އަޅުވެތިކަމުގެ ދަށުގައެވެ.

މި މައުޟޫއާ ގުޅިގެން ޝައިޚް ފަޒްލޫން ބިން މުޙައްމަދު އެކްސްގައި ކުރެއްވި ޓުވީޓެއްގައި ވަނީ ވަރަށް ބޮޑަށް ކަންބޮޑުވުން ފާޅުކުރައްވާފައެވެ. ޝައިޚް ވިދާޅުވި ގޮތުގައި "ބިއްލޫރި ގޭގައި ދިރިއުޅޭ މީހުން އެހެން މީހުންގެ ގޭގެއަށް ގައު އުކާކަށް ނުވާނެއެވެ." އަދި މުސްލިމުންގެ އެންމެ ބޮޑު އަދުއްވުންނަށް އަސްކަރީ އެހީތެރިކަން ދިނުމަކީ ދީނުން ބޭރުވާނެ ކަމެއް ކަމަށް މުޙައްމަދު ބިން އަބްދުލް ވައްހާބުގެ ރިސާލާގައިވާ ކަންކަމަށް ރިއާޔަތްކޮށް ޝައިޚް ފާހަގަކުރެއްވިއެވެ.

ޝައިޚް ފަޒްލޫންގެ ޓުވީޓުގައި ރާއްޖޭގެ މިހާރުގެ ހާލަތަށްވެސް އަލިއަޅުއްވާލެއްވިއެވެ. އެގޮތުން ރާއްޖޭގެ ވެރިޔާ (ރައީސް މުޢިއްޒު) އެމެރިކާއަށް ޗާގޯސްގައި މިލިޓަރީ ބޭސް ހިންގުމަށް އެއްބާރުލުން ދޭނެ ކަމަށް ވިދާޅުވުމާއި، އެމެރިކާގެ އަސްކަރީ މަތިންދާބޯޓެއް ރާއްޖޭގެ މައި އެއާޕޯޓަށް ޖެއްސި ޚަބަރުތަކާ މެދު ސަރުކާރުން ހަނު އޮތުމަކީ ހިތާމަވެރި ކަމެއް ކަމަށް ވިދާޅުވިއެވެ.

މި މައްސަލާގައި ދީނީ އިލްމުވެރިންނާއި އާންމުންގެ މެދުގައި ބޮޑެތި ބަހުސްތަކެއް ކުރެވެމުންދާއިރު، މިއީ ސަރަހައްދީ ހަމަޖެހުމާއި އިސްލާމީ އުންމަތުގެ އެއްބައިވަންތަކަމާ ގުޅިފައިވާ ނާޒުކު މައްސަލައެއްގެ ގޮތުގައި ގިނަ ބަޔަކު ދެކެއެވެ.