އޭސީސީގައި ރައީސް މުއިއްޒުގެ 7 ކޮރަޕްޝަން މައްސަލަ! މައްސަލަތައް މިވަގުތަށް އޮތީ ބެލުން ހުއްޓާލާފައި!

ރައީސް މުއިއްޒު ވެރިކަމަށް އައުމުގެ ކުރިން އޭސީސީގައި ބަލަން ފަށާފައިވާ މުއިއްޒުގެ 7 މައްސަލައެއް އޮތްކަން ހާމަވެއްޖެއެވެ. 

އެހެންނަމަވެސް މި މައްސަލަތައް ބެލުން ނޮވެމްބަރު 2023 ގައި މުއިއްޒު ވެރިކަމަށް އައި ހިސާބުން ފެށިގެން އޮތީ މެދުކެނޑިފައެވެ. 

 ރައީސް މުއިއްޒުގެ ބަލަމުންދާ މައްސަލަތަކުގެ ތެރޭގައި

1. ލޮނުޒިޔާރަތްކޮޅު ސަރަހައްދުގައި ޕްލެޓްފޯމަކާއި ރެސްޓޯރަންޓެއް ހިންގުމަށް ސްޓާރާޑާ ކުންފުންޏަށް ދޫކޮށް އެއްބަސްވުމުގައިވާ މުއްދަތު 5 އަހަރަށް އިތުރުކޮށްދީފައިވާ ކަމަށް ބުނާ މައްސަލައާއި ސިނަމާލެ ބްރިޖު ސަރަހައްދުގައި އިމާރާތްކުރި ޗާޓާއިމް އެތަނުން ނެގުމަށް ބަދަލުގެ ގޮތުގައި 15 މިލިއަން ރުފިޔާ ދިނުމަށް ނިންމައި ހައުސިން މިނިސްޓްރީން ނިންމައި އެފައިސާ ވަރަށް އަވަހަށް ދޭނެ ކަމަށް ބުނި މައްސަލަ
2. ވ. ތިނަދޫގައި އަމިއްލަ ހަރަދުގައި ހައުސިން ޔުނިޓު ތަރައްގީކުރުމަށް ސީ ލައިފް މޯލްޑިވްސްއާ ހަވާލުކޮށް، އެއްބަސްވުން އުވާލުމަށް މަސައްކަތްކުރިއިރު އެ ކުންފުނިން ކުރި ހަރަދުތަކަށް ބަދަލުގެ ގޮތުގައި 3.4 މިލިއަން ޑޮލަރު ދިނުމަށް ސަރުކާރުން ނިންމީ ކުންފުނިން ހުށަހެޅި ބިލުތައް ރަނގަޅަށް ވެރިފައިނުކޮށް އެ ކުންފުންޏަށް ސަރުކާރުން ނާޖައިޒުގޮތުގައި ފައިދާ ހޯދައިދިނުމަށް ކަމަށް ބުނާ މައްސަލަ. ކުންފުނިން ޕްރޮޖެކްޓަށް އަސްލު ހަރަދުކޮށްފައިވަނީ އެއް މިލިއަން ތިން ލައްކަ ރުފިޔާ. 
3. މިނިސްޓްރީ އޮފް ހައުސިން އެންޑް އަރބަން ޑިވެލޮޕްމަންޓްގެ ހިޔާ ކްލަބްގެ ނަމުގައި "ރިޒޯލް ކެފޭ" ހިންގީ ބިޑް ކުރުމެއް ނެތި ދެ ފަހަރެއްގެ މަތިން ދެ އަގެއްގައި ކުލި ނަގައިގެން ކަމަށް ބުނާ މައްސަލަ. ފުރަތަމަ ފަހަރު ކުލީގެ ގޮތުގައި ތިރީސް ހަތަރުހާސް ރުފިޔާ އަދި ދެވަނަ ފަހަރު ކުލީގެ ގޮތުގައި ބާރަހާސް ރުފިޔާ ނަގައި، ކޮރަޕްޝަނަށް މަގުފަހިވާ ގޮތަށް ކަން ކޮށްފައިވޭ
4. މާލޭގައި މެކޭނިކަލް ޕާކިން ހެދުމަށް 4 މަސްދުވަހުގެ ތެރޭގައި ޗައިނާ ޕާޓީއަކާ އެގްރީމެންޓްކޮށް އެފަރާތުން މަސައްކަތުގެ ބޮޑުބައެއް ނިންމާފައި ވަނިކޮށް، ކޮރެއާ ޕާާޓީއަކުން ބުނެގެން ގަވާއިދާ ހިލާފަށް ކޮރެއާ ޕާޓީއަށް އެ މަސައްކަތް ހަވާލުކުރަން އުޅުނު މައްސަލަ
5. ހައުސިން މިނިސްޓަރުކަމުގައި މުއިއްޒު ހުރިއިރު ސަރުކާރުގެ ބައެއް ޕްރޮޖެކްޓްތަކާއި އަދި މުއިއްޒު ހިންގާފައިވާ މާލީ ބައެއް މުއާމަލާތްތަކުގައި ރިޝްވަތާއި މަގާމުގެ ނުފޫޒު ބޭނުންކޮށްގެން ނާޖައިޒު ފައިސާ ހޯދުން ފަދަ ކޮރަޕްޝަނަށް މަގުފަހިވާ ފަދަ އަމަލު ހިންގާފައިވާކަމަށް ބުނާ މައްސަލަ
6. ހިޔާ މަޝްރޫއުގެ ފްލެޓުތައް ލިބޭނެކަމަށް 2018 ވަނަ އަހަރުގެ ނޮވެމްބަރު ކުރީކޮޅު އިއުލާންކުރި ފަރާތްތަކަށް ފްލެޓު ލިބޭނެކަމަށް އޭރު ކަނޑައަޅާފައިވާ ގޮތާ ގުޅިގެން ގިނަ މައްސަަލަތަކެއް ފާހަގަކުރެވިފައިވާ ކަމަށާއި އެކަމުގައި އަމަލީގޮތުން ބައިވެރިވި މީހުންނާ ގުޅޭ ކޮރަޕްޝަނާ ގުޅުންހުރި އަދި ޖިނާއީ މައްސަލަތައް ހިމެނޭ ކަމަށް އެކި ފަރާތްތަކުން ތުހުމަތުކޮށް ސަރުކާރުން އެކަން ފާހަގަކުރާ މައްސަލަ
7. ހިޔާ ފްލެޓު އެޅުމަށް ހަވާލުކޮށްފައިވަނީ ޕްރޮޕޯސަލް ހުށަހެޅި 5 ފަރާތުގެ ތެރެއިން އެންމެ ބޮޑު އަގު ހުށަހެޅި ފަރާތަށް ކަމަށް ބުނާ މައްސަލަ

މިއީ މުއިއްޒު ހައުސިން މިނިސްޓަރުކަމުގައި ހުރެގެން ހިންގި ކަމަށް ބުނާ ކޮރަޕްޝަން މައްސަލަތަކުގެ ތެރެއިން ތުހުމަތު ކުރެވޭ ބައެއް ކަންކަމެވެ. އޭރަށް ވުރެ ބޮޑު ބާރެއް މިއަދު ލިބިފައިވާއިރު މިއަދުގެ އަމަލުތައް ހުންނާނެ ހިސާބެއްވެސް ނޭންގެއެވެ.