ފޯޅަވަހި އިނގިރޭސިން އަތުގައި އޮތުމަކީ އެހެންކަމެއް، އެމީހުން ދޫކޮށްލިޔަސް އެހެން ބަޔަކަށް ދީގެން ނުވާނެ: ރައީސް މުއިއްޒު

ޗާގޯސް ނުވަތަ ފޯޅަވައްސަކީ ދިވެހިރާއްޖެއާ ތާރީޚީ ގޮތުން ވަރަށް ބޮޑަށް ގުޅިފައިވާ ތަނެއް ކަމަށާއި، އިނގިރޭސިވިލާތުން އެ އަތޮޅު އެހެން ބަޔަކާ ހަވާލުކުރާނަމަ ހަވާލުކުރަންޖެހޭނީ ދިވެހިރާއްޖެއާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ފޯޅަވައްސާއި ދިވެހިންނާ ދެމެދު އޮތް ގުޅުމަކީ ދިގު ތާރީޚެއް އޮތް ކަމެއް ކަމަށެވެ. އެގޮތުން 16 ވަނަ ގަރުނުގެ ތެރޭގައި ދިވެހި ރަސްކަލަކު ފޮނުއްވި ސިޓީއެއްގައި، ޗާޓަކާ އެކު އެ ސަރަހައްދަކީ ދިވެހިންގެ ތަނެއްގެ ގޮތުގައި ފާހަގަކޮށްފައިވާކަން ރައީސް ފާހަގަކުރެއްވިއެވެ.

ރައީސް މުއިއްޒު ވިދާޅުވީ އިނގިރޭސިން އެތަނުގައި ތިބުމަކީ މުޅިން އެހެން ކަމެއް ކަމަށެވެ. ނަމަވެސް، އިނގިރޭސިވިލާތުން އެތަން ދޫކޮށްލާ ހާލަތެއްގައި، އެހެން އެއްވެސް ގައުމަކަށް އެތަން ދީގެން ނުވާނެ ކަމަށާއި، އެތަން ލިބެންޖެހޭނީ ދިވެހިރާއްޖެއަށް ކަމަށް އެމަނިކުފާނު ވިދާޅުވިއެވެ.

މި މައްސަލައިގައި ގިނަ ބައެއްގެ މެދުގައި ސުވާލު އުފެދެނީ، މިއީ ހަގީގަތުގައިވެސް ފޯޅަވަހި ނުލިބިގެން އުޅޭ އުޅުމެއްތޯ ނުވަތަ އިނގިރޭސިންގެ އަތުގައި އެތަން ބޭއްވުމަށްޓަކައި ހުޅަނގާއި އެމެރިކާގެ ބުނުމަށް ދިވެހި ސަރުކާރުން ކުޅޭ "ޑާޓީ ގޭމެއް" ތޯއެވެ. އިނގިރޭސިންގެ އަތުގައި ފޯޅަވަހި އޮތުން މައްސަލައަކަށް ނުވާއިރު، މޮރިސަސްއާ އެތަން ހަވާލުކުރުން މައްސަލައަކަށް ވާންޖެހޭ ސަބަބަކާ މެދު ސިޔާސީ މަސްރަހުގައި ވަނީ ބަހުސް އުފެދިފައެވެ.

ފާހަގަކޮށްލެވޭ ގޮތުގައި، ރައީސް މުއިއްޒުގެ ސަރުކާރަކީ އެމެރިކާއާއި އެމެރިކާގެ ނުފޫޒު އޮންނަ ގައުމުތަކާ ގާތް ގުޅުމެއް ބާއްވާ ސަރުކާރެކެވެ. މިކަމާ ގުޅިގެން ލިބޭ މައުލޫމާތުތަކަށް ބަލާއިރު، ފޯޅަވަހި ދިވެހިރާއްޖެއަށް ލިބިއްޖެ ނަމަ، އެތަން އެމެރިކާގެ އަސްކަރީ މަރުކަޒެއްގެ ގޮތުގައި ބޭނުންކުރުމަށް ދޭނެކަމުގެ ވައުދެއް ސަރުކާރުން ވެފައިވާ ކަމަށްވެސް އަޑުތައް ވަނީ ފެތުރިފައެވެ. އެހެންކަމުން، ކުރިއަށް އޮތް ތަނުގައިވެސް ފޯޅަވަހި އޮންނާނީ އެމެރިކާގެ އަސްކަރީ ބޭނުންތަކަށް ހާއްސަވެފައިވާ ތަނެއްގެ ގޮތުގައި ކަމަށް ބެލެވެއެވެ.