އެމެރިކާއާ ދެކޮޅަށް ފަލަސްތީނުގެ ހައްގުގައި އަޑު އުފުލާ މީހުންގެ މައްސަލަ ފުލުހުން ބަލަނީ

އެމެރިކާއާ ދެކޮޅަށް ފަލަސްތީނުގެ ހައްގުގައި އަޑު އުފުލާ މީހުންގެ މައްސަލަ ފުލުހުން ބަލަން ފަށައިފި އެވެ. 

އެގޮތުން އެމެރިކާ ސަރުކާރުން މާލޭގައި ހިންގާ އެމެރިކަން ސެންޓަރުގައި "ކުޑަކުދިން މަރާ ބައެއް" ކަމަށް ލިޔުނު މީހެއްގެ މައްސަލަ ފުލުހުން ވަނީ ބަލަން ފަށާފައެވެ. 

އެކަން ކުރި އަހުމަދު ސޮބާހު ވަނީ އެއީ އިޒްރޭލުން ފަލަސްތީނުގައި ހިންގާ ލާއިންސާނީ އަމަލުތަކާ ދެކޮޅަށް ހެދި އާޓް ވޯކެއް ކަމަށް ބުނެފައެވެ. 

އިޒްރޭލުން ހިންގާ ލާއިންސާނީ އަމަލުތަކަށް އެންމެ ބޮޑަށް ވާގިވެރިވާ ގައުމަކީ އެމެރިކާއެވެ. އެހެންނަމަވެސް ސަރުކާރުން އަންނަނީ އެމެރިކާއާއެކު ގާތް ގުޅުމެއް ބާއްވަމުންނެވެ. 

ފަލަސްތީނުގެ މައްސަލާގައި ހަރުދަނާ ފިޔަވަޅެއް ރާއްޖެއިން އަޅަން ނުކެރުނުތާ މިހާރު ފެންނަނީ އެކަމާ ދެކޮޅަށް އަޑު އުފުލާ މީހުންނަށްވެސް ފިޔަވަޅު އަޅަމުންދާ މަންޒަރެވެ. އެގޮތުން މާލެ ސަރަހައްދުގައި ހުރި ބައެއް ގައުމުތަކުގެ އޮފީސްތައް ކުރިމަތީ އިހުތިޖާޖު ކުރާ މީހުންނަށް ފުލުހުން ވަނީ މީގެ ކުރިން ހުރަސްވެސް އަޅާފައެވެ. 

ރައީސްގެ ގަރާރަކުން އިޒްރޭލު ޕާސްޕޯޓު މަނާކުރެވެން އޮއްވައި އެކަން ވެސް ވަނީ އަނެއްކާވެސް މަޖިލީހަށް ފޮނުވާފައެވެ.