ފިނޭންސް މިނިސްޓްރީގެ އިއްޒަތްތެރިންގެ ކުއްލި މުއްސަނދިކަން: ވަގު ބޯޑް ޖެހި ތިން ހަތަރު ކާރާއި މިނިސްޓްރީގެ ގޯތިން ހިލޭ ޕާކިންގ

މިނިސްޓްރީ އޮފް ފައިނޭންސްގެ އިސް މީހުން މި ސަރުކާރަށް އަހަރެއް ނުފުރެނީސް އަގުބޮޑު ކާރުތަކެއް ގަނެ، ވަގު ބޯޑު ޖަހައިގެން ބޭނުންކުރަމުންދާކަން ހާމަވެއްޖެއެވެ.

ބައެއް މީހުން މި ކުރު މުއްދަތުގެ ތެރޭގަ ތިންހަތަރު ކާރު ގަނެފަވާކަން އަޅުގަނޑުމެން ބެލިބެލުމުން ވަނީ އެނގިފައެވެ.

ސްޓޭޓް މިނިސްޓަރ ހުސެން ޝާމް އާދަމްގެ ތިން ކާރު އޮންނައިރު، ސްޓޭޓް މިނިސްޓަރ އަހުމަދް މާޒިން އާއި ޑެޕިއުޓީ މިނިސްޓަރ އަހުމަދް އަޖުވަދު އަދި އެކައުންޓެންޓް ޖެނެރަލް މުހައްމަދް އަޒާދް، ސްޓޭޓް ޝެއަރހޯލްޑިންގ މެނޭޖްމަންޓް ޑިޕާރޓްމެންޓްގެ ހެޑް މުހައްމަދު ޝިފާހު އަދި ވިސްލްބްލޯވަރ ޕްރޮޓެކްޝަން ކޮމިޓީގަ އުޅޭ އެސިސްޓެންޓް ފަންޑް އޮފިސަރ އަބްދުލް މުއީން އަބްދުލް ގަނީވެސް ވަނީ ކޮންމެ މީހަކު ކާރެއް ގަނެފައެވެ.

 

 

ކާރު ރަޖިސްޓްރީކުރުން މިނިސްޓްރީ އޮފް ޓްރާންސްޕޯޓްއިން ހުއްޓާލާފަ އޮތް ނަމަވެސް ފިނޭންސްގެ މި ގްރޫޕްއިން ވަނީ އެހެން ގޮތެއް ހޯދާފައެވެ.

އަޅުގަނޑުމެންގެ ތަހުޤީގުން ދައްކާ ގޮތުގަ މި މީހުން ގަނެފަވާ ކާރުތައް ރަޖިސްޓްރީކޮށްފަވަނީ އައްޑޫ ސިޓީއަށެވެ. އެހެންކަމުން މާލޭގަ މި މީހުން މި ކާރުތައް ދުއްވަނީ ވަގު ބޯޑްގައެވެ.

މީގެ އިތުރުން މި މީހުންގެ ހުރިހާ ކާރުތައް ޕާކްކުރަނީ އެއްވެސް އަގެއް ނުދީ ހިލޭ މިނިސްޓްރީ އޮފް ފައިނޭންސްގެ ގޯތި ތެރޭގައެވެ.

ފިނޭންސްގެ އިސް މީހުން މިފަދަ ބޮޑު ޖަރީމާއެއް ހިންގަމުންދާއިރު ޕާކް ކުރާނެ ތަނެއް ނެތިގެން އާންމު ރައްޔިތުންގެ އަގުބޮޑު ކާރުތައް މަގުމަތިވެ، ސްޓިކަރ އާއި ޖޫރިމަނާގެ ތަކުލީފް އޮތީ ބޮޑުވެފައެވެ.

އަދި ލިބޭ އާމްދަނީއާ ނުބައްދަލު ބޮޑު މުއްސަނދިކަމެއް ކުރު މުއްދަތެއްގެ ތެރޭ މި މީހުން ހޯދިއިރު ކަމާބެހޭ މުއައްސަސާތަކުން މިކަމަށް މާބޮޑު ސަމާލުކަމެއް ނުދެއެވެ.

މި މީހުންގެ ތެރެއިން ޝާމަކީ ފިނޭންސްގެ 4 ޑިޕާޓްމެންޓް ބަލަހައްޓާ އަދި ކަރަޕްޝަންގެ ބޮޑެތި ތުހުމަތުތައް ކުރެވޭ މީހެކެވެ.

ފެނަކަގެ ޖަނަރޭޓަރ ސަޕްލައި ޕްރޮޖެކްޓުން އެކަނިވެސް 5 މިލިޔަން ރުފިޔާ ނެގިކަމުގެ ތުހުމަތު އޭނާއަށް ކުރެވޭއިރު، ބާރާ ނުފޫޒް ބޭނުންކޮށްގެން ގާތްތިމާގެ މީހުން ކުންފުނިތަކުގެ ބޯޑަށް ޝާމްވަނީ ހަމަޖައްސާފައެވެ.