ހިތްނަވަރު ރައްޔިތެެއްގެ ދަޢުވާ: ހިތްނަވަރު ދާއިރާގެ މެންބަރުގެ ޖުވާ ވިޔަފާރި ހުއްޓުވުމުން ދާއިރާ ފޫގަޅައިފި

ހިތްނަވަރު ދާއިރާގެ މިހާރުގެ މަޖިލީސް މެންބަރު މުހައްމަދު އަބްދުލް ރަހްމާނުގެ އަމިއްލަ 3 ޖުވާ ޓޭބަލްއާއި އޮންލައިން ކަސީނޯ ސައިޓެއް ހިންގަމުންދާކަމަށް ބެލެވޭ ކަމަށް އެރަށުގެ ޕީޕީއެމްގެ އިސް މެންބަރަކު މި ނޫހަަށް މައުލޫމާތުދީފިއެވެ.

ސަރުކާރުން ރާއްޖޭގެ އޮންލައިން ކަސީނޯތަކާއި ޖުވާ ޓޭބަލްތައް ބަންދުކުރަން ނިންމާފައިވަނީ، މިކަން ހައްދުފަހަނައަޅައިގެން އާންމު މުޖުތަމަޢުގެ ހަމަޖެހުން ގެއްލެމުންދާތީއެވެ. މިކަމާ ގުޅިގެން ހިތްނަވަރު ދާއިރާގެ މެންބަރުގެ ވިޔަފާރިއަށް އަސަރުކުރާނެކަމަށް ބެލެވެއެވެ.

"ރަށުގައި އެބަތިބި ވަޒީފާ އަދާކުރާހެން އޭނަގެ ޓޭބަލްތައް އޮޕަރޭޓު ކުރަން ލައިފައިތިބި މީހުން، މިދަނީ ޖީލެއް ހަލާކުވާން. ކުރިން ހަލާކުވީ މަސްތުވާތަކެތީގެ ޝިކާރައަކަށްވެގެން، މިއީ އަދި މާ މުޑުދާރު ކަމެއް" މި މަޢުލޫމާތު ދިން ފަރާތުން ބުނެފައިވެއެވެ.

މަޢުލޫމާތު ލިބޭގޮތުގައި ހިތްނަވަރު މަޖިލީސް ޕީއެންސީ ޕްރައިމަރީއަށް އެކަނި 12 މިލިއަން ރުފިޔާ މުހައްމަދު ޚަރަދުކުރި ކަމަށާއި، މައި އިންތިޚާބުގައި އިތުރު 10 މިލިއަން ރުފިޔާ ޚަރަދުކުރި ކަމަށްވެސް މަޢުލޫމާތު ދޭ ފަރާތުން ބުނެފައިވެއެވެ.

މި މެންބަރު މަޖިލީހުގައި މައިކް އޮންކޮށްލި ކަމެއްވެސް ނޭނގޭ ކަމަށާއި މުޢާމަލާތް ކުރަން ނޭނގޭނެ ކަމަށް އެ ރަށުގެ ރައްޔިތުން ބުނެއެވެ. ޕީއެންސީ ޕްރައިމަރީގައި މުހައްމަދަށް ސަޕޯޓު ދިނީ އަބްދުއްރަހީމްގެ އިތުރުން މެޑަމް ސާޖިދާ ކަމަށާއި، މިއީ ފައިސާއަށް ވިއްކާލި ގޮނޑިއެއް ކަމަށްވެސް އެރަށުގެ ޕީޕީއެމްދަނީ ބުނަމުންނެވެ.