އިންޑިޔާއަށް ބުލީ ކުރުމަށް ފަހު، ކާޑު ހޯދަން އިންޑިޔާ ގާތަށް ދާން ނުޖެހޭނެކަމަށް ބުނުމަށްފަހު ކާޑު ހޯދަން އަދިވެސް އިންޑިޔާ ގާތަށް! އޭގެ ފަހުން އަދިވެސް ޑެޕިޔުޓީ މިނިސްޓަރުން އިންޑިޔާއަށް ބުލީ ކުރުމުގައި ކުރިއަށް!

ރައީސް މުއިއްޒު ތުރުކީއަށް ކުރެއްވި ދަތުރުފުޅު ނިންމާލުމަށްފަހު އައިސް ދެންނެވީ މިިހެންނެވެ. 

"ބޭސިކް ކޮމޮޑިޓީޒްއަށް ވަކި ގައުމަކަށް (އިންޑިޔާއަށް) ބަރޯސާ ވާކަށް ނުޖެހޭނެ، އަޅުގަނޑުމެން ވާނީ ހަނޑޫ ހަކުރު ފުށް ގެނައުމަށް އެއް އަހަރު ދުވަހާ އިތުރު 10 ޕަސެންޓަށް ވާ ވަރަށް އެއްބަސްވުން ހެދިފައި، މިހާރު ފުށުގެ ފުރަތަމަ ޝިޕްމަންޓަށް ވަނީ އޯޑަރު ދެވިފައި، ފެބްރުއަރީ މަހު އަންނާނެ، ހަނޑޫ، ހަކުރު، ބިސް، ފިޔާ، އަލުވި އެހެން ގައުމުތަކުން ވަނީ ހަމަޖެހިފައި، އެތަކެތި އަންނާނެ،" 

މި ވަރަށް ފޮނި ކެނޑުމަށްފަހު އަޅުގަނޑުމެން ހީކުރީ ދެން އަލުން ދުވަހަކުވެސް އިންޑިޔާއިން ކާބޯތަކެތި ނުގެންނާނީ ކަމަށެވެ. ދިވެހިން ދެން ކާނީ ތުރުކީގެ މޮޅު ކޮލިޓީ ފުށް ކަމަށެވެ. 

ކަން މިވީ އެހެނަކުން ނޫނެވެ. އިންޑިޔާއަށް ބުލީކޮށް ޖެއްސުން ކުރުމަށްފަހު އެއްކަލަ ކާޑުގެ ބާވަތްތައް ހޯދަން ޖެހޭ މިންވަރު އިތުރު ކުރުމަށް ދާން ޖެހުނީ އިންޑިޔާ ގާތަށެވެ. ތުރުކީ އާއި އެހެނިހެން ގައުމުތަކާއެކު ވީ އެއްބަސްވުންތައް ކޮބާ ހެއްޔެވެ؟ އިންޑިޔާއަށް ބަރޯސާ ވާން ނުޖެހޭނެ ކަމަށް ބުނެ ދެއްކި ވާހަކަތައް ކޮބާ ހެއްޔެވެ؟ 

މި ވަރުން އަދި ނިމުނީއެއް ނޫނެވެ. ކާބޯތަކެތި ރާއްޖެ އެތެރެކުރާ މިންވަރު އިތުރުކޮށްދިނުމަށް އެދުމަށްފަހުވެސް ސަސްޕެންޑް ވެފައި ތިބި ބުލީކުރާ ޑެޕިޔުޓީ މިނިސްޓަރުން އިންޑިޔާއަށް ހަމަ ބުލީ ކުރަނީއެވެ. މިފަހަރު އެމްޑީޕީގެ ކެމްޕެއިން ޕޯސްޓަރަކަށް އިންޑިޔާގެ ބީޖޭޕީގެ ލޯގޯ ލައިގެންނެވެ. 

މުއިއްޒުގެ އަގު ވެއްޓުމުގައި އެންމެ އިސް ދައުރެއް މި އަދާ ކުރަނީ މުސާރަ ނަގައިގެން ސަސްޕެންޝަންގައި ތިބި ޑެޕިޔުޓީ މިނިސްޓަރުންނެވެ. އިންޑިޔާއިން ކާބޯތަކެތި އެތެރެ ކުރާ މިންވަރު އިތުރުކޮށްދިނުމުން ކުޑަމިނުން ޝުކުރު އަދާ ކޮށްލަން ކީއްހެއްޔެވެ؟