ކަނު އަނދިރީގެ ހިންގާ ޑީލް އެއްގެ މުގުލުގައި ބަފައަކާ ދަރިފުޅު. ހައިރާން ކުރަނިވި ވާހަކަތަކެއް

2010 ވަނަ އަނަ އަހަރު، އޭނާގެ ރައްޓެހިންގެ މެދުގައި "އިއްލެ" ގެ ނަމުން މަޝްހޫރު ޢަބްދުﷲ ޢާރިފް، ސަރުކާރުގެ ޔުޓިލިޓީ ކުންފުންޏެއް ކަމުގައިވާ ސްޓެލްކޯއާ ގުޅުންހުރި ސްކޭންޑަލެއްގައި ޖެހުނެވެ. ސެންޓަރ އެންޓަރޕްރައިސަސްގެ މެނޭޖިންގ ޑިރެކްޓަރު ކަމުގައިވާ އިއްލެ، ސްޓެލްކޯއަށް ދެ ފޯކްލިފްޓް ސަޕްލައިކުރިއެވެ. މިކަމުގެ ސަބަބުން ދިގު މުއްދަތެއްގެ ޤާނޫނީ މައްސަލައަކާއި، ކޮރަޕްޝަންގެ ތުހުމަތުތަކަކކާއި، 9 މިލިއަން ޑޮލަރުގެ ނުދެއްކި އޮތް ދަރަންޏެއް އުފެދުނެވެ. 13 އަހަރު ފަހުން ވެސް، އިއްލެ އަދިވެސް ސްޓެލްކޯގެ މުހިންމު މީހުންނާއެކު ޝައްކުއުފެދޭ ޑީލްތަކެއްގެ ތެރެއިން ބަދަލު ހޯދުމަށް މަސައްކަތް ކުރަމުންދެއެވެ.

ސްޓެލްކޯއިން ފުރަތަމަ 2010 ގައި އިއްލެގެ އަތުން 08 ޓަނުގެ ދެ ފޯކްލިފްޓް އޯޑަރުކުރިއެވެ. ނަމަވެސް އިއްލެ ސަޕްލައިކޮށްފައިވަނީ 5 ޓަނުގެ ދެ ފޯކްލިފްޓްކަން ހާމަވުމުން މައްސަލަ ބޮޑުވެގެން ދިޔައެވެ. ތުހުމަތުތަކުގައިވާ ގޮތުން، މެޝިންތަކުގެ ސްޕެސިފިކޭޝަންތައް ސްޕްރޭ ޕެއިންޓް ބޭނުންކޮށްގެން އަތުން ބަދަލުކޮށް، 10 ޓަނުގެ ޝަރުތު ފުރިހަމަވާކަމަށް ދޮގުކޮށް ދައްކާފައިވެއެވެ. އޭރު ސަން އަދި ހަވީރު ފަދަ ނޫސްތަކުން މި ކޯޓު މައްސަލަ ވަރަށް ގާތުން ކަވަރުކުރިއެވެ.

މި ސްކޭންޑަލްގެ ފަހުންވެސް، ސްޓެލްކޯއިން ފޯކްލިފްޓްތަކަށް ފައިސާ ދައްކާފައެއް ނުވެއެވެ. އަދި އެތަކެތި ބޭނުންކޮށްފައެއްވެސް ނުވެއެވެ. މިހާރު އެ އާލާތްތައް ވަނީ ދަބަރުޖަހައި ބޭނުން ނުކުރެވޭ ހާލަތުގައެވެ. އިއްލެ ބަދަލު ހޯދަން ކުރި މަސައްކަތް 10 އަހަރަށްވުރެ ގިނަ ދުވަހު ވަނީ ހުއްޓުވިފައެވެ. އަދި މިހާރު އޭނާ އަހަރުތަކެއް ވަންދެން ލިބުނު ގެއްލުމުގެ ބަދަލުގެ ގޮތުގައި 9 މިލިއަން ޑޮލަރު ހޯދަން އުޅޭތީ މި މައްސަލަ އަނެއްކާވެސް ފާޅުވެފައިވެއެވެ.

ފަހުގެ ކަންތައްތަކުގައި، އިއްލެ ބައްދަލުކޮށްފައިވަނީ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސް އަދި އެލްޖީއޭގެ ސީއީއޯ މުޙައްމަދު ނިމާލް އާއި އޭނާގެ ދަރިފުޅު، ސްޓެލްކޯގެ މެނޭޖަރެއް ކަމުގައިވާ އިބްރާހީމް އަޒިޔާން ނިމާލްއާ ކަމަށް ބުނެވެއެވެ. ސްޓެލްކޯ އަދި ފެނަކަ ކޯޕަރޭޝަންގެ އެކި ކޮރަޕްޝަން ސްކޭންޑަލްތަކުގައި ބައިވެރިވެފައިވާކަމަށް މަޝްހޫރު ނިމާލް އާއި އޭނާގެ ދަރިފުޅަކީ އިއްލެއާއެކު ކަޅުއަނދިރި ޑީލެއް ހެދުމަށް މަސައްކަތްކުރާ މައިގަނޑު ފަރާތްތައް ކަމަށް ތުހުމަތުކުރެވެއެވެ.

ސެމިލިސް ރެސްޓޯރަންޓްގައި ބޭއްވުނު ބައްދަލުވުމެއްގައި، އިއްލެ އޭނާގެ މައްސަލަ ނިމާލް އަދި އަޒިޔާނާ ހިއްސާކޮށް، ދަޢުވާ ހައްލުކުރުމަށް ޑީލެއް ހުށަހެޅިއެވެ. އެތަނުގައި ތިބި މަޞްދަރުތަކުން ބުނާގޮތުގައި، އިއްލެ ހުށަހަޅާފައިވަނީ 3 މިލިއަން ޑޮލަރު ދިނުމަށެވެ. އަދި މި އެއްބަސްވުން ކުރިއަށްދާނަމަ، އެމީހުންނަށް 46 މިލިއަން ރުފިޔާގެ ކަޓެއް ދޭނެކަމަށް ވަޢުދުވިއެވެ.

ނިމާލްގެ ދަރިފުޅު، އަޒިޔާން، އޭނާގެ ބައްޕަ ރާވާފައިވާ، ހިންގާފައިވާ އެކި ކޮރަޕްޝަންގެ ޑީލްތަކުގައި މުހިންމު ދައުރެއް އަދާކޮށްފައިވާ ކަމަށް ތުހުމަތުކުރެވެއެވެ. ސްޓެލްކޯގައި މެނޭޖަރެއްގެ މަޤާމު އަދާކުރަމުންދާއިރުވެސް، އަޒިޔާން ގިނަފަހަރު ޗުއްޓީ ނަގަނީ ސިޔާސީ ހަރަކާތްތަކުގައި ބައިވެރިވުމަށެވެ. އަދި މިކަން ގިނަފަހަރު ކުރަނީ ސްޓެލްކޯގެ ޚަރަދުގައެވެ. އަދި މާލޭގެ 24/7 ކެފޭތަކުގައި މިކަމާއި ގުޅުންހުރި މީހުންނާއެކު ރޭގަނޑު ބައްދަލުވުންތަކުގައި ބައިވެރިވާ ތަން ފެނިފައިވެއެވެ.

ނިމާލް އަދި އަޒިޔާންގެ އިތުރުން، އިއްލެ މަސައްކަތްކޮށްފައިވަނީ ސްޓެލްކޯގެ ސީއެފްއޯ، ޖުމްހޫރީ ޕާޓީގެ ނައިބު ރައީސް ސަޢޫދުގެ އަނބިކަނބަލުން ފާޠިމަތު ލީނާގެ އެހީތެރިކަން ހޯދުމަށް ކަމަށްވެސް ބުނެވެއެވެ. ލީނާ ބުނެފައިވަނީ މި ޑީލް ފަސޭހަކޮށްދިނުމަށް އޭނާއަށް ވެވުނު އެންމެ ރަނގަޅަކަށް މަސައްކަތްކުރާނެ ކަމަށެވެ. މިކަމުން މި މައްސަލައާ ގުޅިފައިވާ ސިޔާސީ އަދި މާލީ މަސްލަހަތުތަކުގެ ވިއުގަ އިތުރަށް ބޮޑުވެގެން ގޮސްފައިވެއެވެ.

ނިމާލް އޭނާގެ ދަރިފުޅު ޢާންމުންގެ ސަމާލުކަމުން ދުރުގައި ބަހައްޓަން ވަރަށް ފަރުވާތެރިވެއެވެ. އެގޮތުން އަޒިޔާނައަކީ ނިމާލުގެ ދަރިއެއްކަން ޕަބުލިކުގައި ހާމަނުކުރުމަށް، ނިމާލުގެ ސޯސަލްމީޑިއާ އެކައުންޓުތަކުން ވަނީ އަޒިޔާންގެ ފޮޓޯތައް ހައިޑްކޮށްފައެވެ. މިކަމުގެ ސަބަބުން، ފާއިތުވި އަހަރުތަކުގައި އަޒިޔާނަށް ވަނީ ގިނަ ޝައްކުއުފެދޭ މުޢާމަލާތްތަކެއްގައި މީހުންނަށް ނޭނގި ބައިވެރިވެވިފައެވެ. އިއްލެ، ނިމާލް އަދި އަޒިޔާން މި ތިން މީހުން މިހާރު ތިބީ ދިގު މުއްދަތެއް ވަންދެން ނުނިމި އޮތް ފޯކްލިފްޓް ސްކޭންޑަލް ހައްލުކުރުމަށް ކޮންމެ ހައްދަކަށްވެސް ދާންތައްޔާރަށެވެ. މިކަމުގައި ބޮޑު އަދަދެއްގެ ފައިސާގެ މަންފާއެއް މިދެބަފައިންނަށް ވާނެއެވެ. މިހާތަނަށް، އިއްލެގެ 9 މިލިއަން ޑޮލަރުގެ ދަޢުވާއަށް ފައިސާ ދައްކާފައެއް ނުވެއެވެ. އަދި ފޯކްލިފްޓްތައް ދަނީ ސްޓެލްކޯގެ ގޯތިތެރޭގައި ދަބަރުޖަހަމުންނެވެ.