ކައްޒާބުގެ ސަރުކާރުން 155 ވައުދު ފުއްދި ގޮތުގެ ހިލަމެއް އަތޮޅުތެރެއަކަށް ނުވޭ!

ކައްޒާބު މުއިއްޒުގެ ސަރުކާރުން 161 ވައުދުގެ ތެރެއިން 155 ވައުދު ފުއްދާފައިވާ ކަމަށް ބުނެ އާންމުންނަށް އޮޅުވާލުމަށް މަސައްކަތްކޮށްފި އެވެ. 

މި ވެރިކަމުގެ ހަފްތާ 14ގެ ތެރެއިން ކުރުމަށް ނިންމާފައިވާ ކަންކަމުގެ ތެރެއިން ގިނަ ކަންކަން ކޮށްފައިވާކަމަށް މުއިއްޒު ބުނެފައިވެއެވެ. 

ހަފްތާ 14ގެ ތެރެއިން ގިނަ ކަންތައްތަކެއް ކުރެވިފައިވާ ކަމަށް މުއިއްޒު ބުނާއިރު މިއިން ވައުދެއްގެ ސަބަބުން އަތޮޅުތެރެއަށް ވީ ފައިދާއެއް ފެންނާކަށް ނެތެވެ. އޭގެ ބަދަލުގައި ފެނިގެން ދިޔައީ އަތޮޅުތެރެއަށް ކުރީ ސަރުކާރުން ފަށައި ދިން މަސައްކަތްތައް ފައިސާ ނެތްކަމަށް ބުނެ ހުއްޓުވާ އަދި ހުއްޓުވުމަށް މަސައްކަތް ކުރާ މަންޒަރެވެ. 

ރައްޔިތުންނަށް ފައިދާ ވާނެ ފަދަ މަޝްރޫއުތައް އެންމެ ބޮޑަށް ކުރިއަށް ގެންދިޔަ ކުންފުނި، އެމްޓީސީސީއަށް އެކަމުގެ ގެއްލުން ވާ ކަމަށް ބުނެ އެ މަޝްރޫއުތައް ހުއްޓުވުމަށް މި ސަރުކާރުން އަންނަނީ މަސައްކަތް ކުރަމުންނެވެ.

ހަފްތާ 14 ގެ ތެރޭގައި ހިމަނާފައި ހުރީވެސް އެކަމެއްގެ ސަބަބުން އަމަލީ ގޮތުން މާ ބޮޑު މަންފާއެއް ކުރާނެ ކަންކަމެއް ނޫނެވެ. އޭގެ ތެރޭގައި ހިމަނާފައި ހުރީ ކޮންމެވެސް ކަމަކަށް ސިޔާސަތުތަކެއް ކަނޑައެޅުން ނުވަތަ ކޮންމެވެސް މަރުކަޒެއް ގާއިމްކުރުމާއި ޕޯޓަލެއް ގާއިމް ކުރުން ފަދަ ކަންކަމެވެ. 

އަތޮޅުތެރެއަށް ހާއްސަކޮށްގެން މި ސަރުކާރުން އެއްވެސް މަސައްކަތެއް ކުރާ ތަނެއް ނުވެސް ފެނެއެވެ. މުއިއްޒުގެ ވައުދުތަކުގައި އިސްކަން ދީފައި ހުރީވެސް ބޮޑެތި އާބާދީތަކަށް ނުވަތަ ސިޓީތަކަށެވެ. ކުދި ރަށްތަކަށް އަމާޒުކޮށް ވައުދުވެ މަސައްކަތް ކުރުމަކީ މުއިއްޒު ދަންނަ ސިފައެއް ނޫނެވެ.