މޯލްޑިވިއަނުން ހިންގާ އެއާ އެމްބިއުލޭންސް މާ ގިނައިން ރިޒޯޓުތަކަށް ދާތަން ފްލައިޓް ރާޑަރުން ފެންނަނީ ރިޒޯޓުތަކުގައި ބަލި މީހުން ގިނަ ކަމުން - މޯލްޑިވިއަން އެމްޑީ

މޯލްޑިވިއަން އެއަރލައިންސްގެ އެއާ އެމްބިއުލޭންސް ޚިދުމަތް ނަމުގައި ހިންގާ ސީޕްލޭނުން މިހާރު އުފުލަމުންދަނީ ޓޫރިސްޓުން ކަމަށް ފްލައިޓް ރާޑަރުތަކުގެ ރިކޯޑުތަކުން ހާމަވެއްޖެއެވެ.

މި ޚިދުމަތް ފެށުމަށްޓަކައި ކުރިން ބޭނުންކުރި ސީޕްލޭނުގެ ބޭރުގެ ކުލަ ބަދަލުކުރި ނަމަވެސް، މިހާރު އެ ޚިދުމަތް ބޭނުންކުރަމުންދަނީ ޓޫރިސްޓުން އުފުލުމަށް ކަމަށް ބެލެވެއެވެ.

މަޢުލޫމާތު ލިބިފައިވާ ގޮތުގައި މުޅި މި މަހު އެންމެ ބަލިމީހަކުވެސް އުފުލާފައެއް ނުވެއެވެ. އެހެންނަމަވެސް މިދިޔަ ހަފްތާގައި އެކަނިވެސް ގިނަ އަދަދެއްގެ ރިޒޯޓުތަކަށް ޗާޓަރު ދަތުރުތައް ކޮށްދީފައިވާކަން ފާހަގަކުރެވެއެވެ.

މި ހަފުތާ ތެރޭ މި ސީޕްލޭނުން ދަތުރުކޮށްފައިވާ ރިސޯޓުތައް

• ބްރެނިއާ ކޮއްޓެފަރު
• ރޮބިންސަން ނޫނު
• ވައްކަރު މޯލްޑިވްސް
• ކިހާ މޯލްޑިވްސް
• ފިނޮޅު މޯލްޑިވްސް
• އެއްލައިދޫ މޯލްޑިވްސް
• މަޑިފުށި ޕްރައިވެޓް އައިލެންޑް

މީގެ އިތުރުން، މި ވަގުތު އެ ފްލައިޓުގެ އިންޓީރިއަރ ހުރީ ބަލިމީހުން އުފުލުމަށް އެކަށީގެންވާ ގޮތަކަށް ނޫންކަމަށްވެސް ބުނެވެއެވެ. ބޭރުގެ ކުލަ ބަދަލުކުރުމަށްފަހު ނަގާފައިވަނީ ހަމައެކަނި ފޮޓޯއެއްކަމަށްވެސް މަޢުލޫމާތު ލިބެއެވެ.

ނަމަވެސް މި މައްސަލައާ ގުޅޭގޮތުން މޯލްޑިވިއަންގެ އެމްޑީ ވިދާޅުވެފައިވަނީ ރިޒޯޓުތަކަށް ކުރާ ދަތުރުތަކަކީ ބަލިމީހުން އުފުލުމަށް ކުރާ ދަތުރުތަކެއް ކަމަށެވެ. އަދި ރިޒޯޓުތަކުގައި މިހާރު އާދަޔާ ޚިލާފަށް ބަލި ފަތުރުވެރިން ގިނަވަމުންދާކަމަށް މޯލްޑިވިއަންގެ އެމްޑީ މައުލޫމާތު ދެއްވިއެވެ.