މަސްވެރިން މިހާރު ކުރަމުންދާ ސުލުހަވެރި އިހުތިޖާޖުގައި ތަންތަނަށް ގެއްލުންދީ، މުވައްޒަފުންނަށް ބިރުދައްކާ ކަމަށް ބުނެ ޝިޔާމު ފަތުރަނީ ހޮޅި ވާހަކަތަކެއް- މަސްވެރިން

މަސްވެރިން މިހާރު ކުރަމުންދާ ސުލުހަވެރި އިހުތިޖާޖުގައި ތަންތަނަށް ގެއްލުންދީ، މުވައްޒަފުންނަށް ބިރުދައްކާ ކަމަށް ބުނެ ޝިޔާމު ފަތުރަނީ ހޮޅި ވާހަކަތަކެއް ކަމަށް މަސްވެރިން ބުނެފި އެވެ. 

އައްޑޫ ފިޝަރީޒް ކޮމްޕްލެކްސް ގައި މަސްވެރިން ކުރަމުންދާ އިހުތިޖާޖުގައި އެތަނަށް ގެއްލުން ދީ، ކަރަންޓު ކަނޑައި ތަނުގެ މުވައްޒަފުން ރޭ ނިދަން ޖެހުނީ އޮފީސް ބޭރުގައި ސަތަރި އަޅައިގެން ކަމަށް ރިޕޯޓު ކޮށްފައިވެ އެވެ. 

އެހެންނަމަވެސް މި ވާހަކަތައް މަސްވެރިން ވަނީ ދޮގުކޮށްފަ އެވެ. 

މަސްވެރިންގެ އިހުތިޖާޖުގައި އެމީހުން ގޮވާލަމުން ދަނީ ތިން މަސް ވަންދެން ނުދީ ހުރި ފައިސާ އެ މީހުންނަށް ދިނުމަށެވެ. ފައިސާ ނުދީ ލަސްވުމުގެ ސަބަބުން އެމީހުންގެ އާއިލާތައް ބިކަވަމުން ދާ ކަމަށް އެ މީހުން އަންނަނީ ތަކުރާރުކޮށް ބުނަމުންނެވެ. 

ސަރުކާރުން ބުނާ ގޮތުގައި ކުރީ ސަރުކާރުން ފައިސާ ދީފައިވާ މިންވަރަށް ވުރެ ރަނގަޅަށް މި ވެރިކަމުގައި ފައިސާ އަންނަނީ ދޫކުރަމުންނެވެ. އެހެންނަމަވެސް މި ވެރިކަން އައި ފަހުން މަސްވެރިންނަށް ފައިސާ ދިނުން ލަސްވެ އިހުތިޖާޖު ކުރާތާ މިއީ ތިންވަނަ ފަހަރެވެ.

މަސްވެރިންނަށް ފައިސާ ނުދީ ދެ މަހަށް ވުރެ ގިނަ ދުވަސް ވެފައިވާކަމަށް ޝިޔާމް ވެސް މީގެ ކުރިން އެއްބަސްވެފައިވެ އެވެ.