އެމްއެންޑީއެފްގެ އަސްކަރީން ސީޕްލޭން ޓާމިނަލްގައި ފުލް ތައްޔާރީ ޙާލަތުގައި

ވެލާނާ އިންޓަނޭޝަނަލް އެއަރޕޯޓުގެ ސީޕްލޭން ޓާމިނަލްގައި އެމްއެންޑީއެފްގެ އަސްކަރީން ފުލް ތައްޔާރީ ޙާލަތުގައި ތިބިކަން މި ނޫހަށް ލިބުނު ފޮޓޯއެއް އަކުން ހާމަވެއްޖެއެވެ. މި ފޮޓޯގައި ފެންނަނީ އަސްކަރީ ޔުނީފޯމާއި ހަތިޔާރާއެކު ތިބި ސިފައިންނެވެ.

 

ފޮޓޯތަކުގައި ފެންނަ މަންޒަރުތަކުގެ ތެރޭގައި، ޑިފެންސް މިނިސްޓަރ އަލްއުސްތާޛު މުޙައްމަދު ޣައްސާން މައުމޫން އަސްކަރީންނަށް ބްރީފިންގ ދެއްވަމުންދާ މަންޒަރު ހިމެނެއެވެ. މީގެ އިތުރުން، ހަތިޔާރާއެކު ތައްޔާރީ ޙާލަތުގައި ތިބި ސިފައިންނާއި، ފުލް ކެމަފްލާޖް ކޮމްބެޓް ޔުނީފޯމުގައި ހުރި ސްނައިޕަރެއްގެ މަންޒަރުވެސް ފޮޓޯތަކުން ފެނެއެވެ.

މި ޙަރަކާތަކީ ކޮން ބޭނުމެއްގައި ކުރިއަށްގެންދާ ޙަރަކާތެއްކަން އަދި އެމްއެންޑީއެފްއިން ހާމަކޮށްފައެއް ނުވެއެވެ. ނަމަވެސް، މިފަދަ ޙަރަކާތްތަކަކީ އާންމު އުސޫލުން އެކްސަސައިޒެއްގެ ގޮތުގައި ކުރިއަށްގެންދާ ކަމެއްނަމަ، އާންމުކޮށް އިޢުލާންކުރާ ކަމެއްކަމަށް ޤަބޫލުކުރެވެއެވެ.