މުއާޒްގެ އުފަން ރަށް މަޑަވެލި އިންޖީނުގެ ވެހިކަލް ދޮންނަ ގަރާޖަކަށް ބަދަލުކޮށްފި

ފެނަކަ މެނޭޖިންގ ޑިރެކްޓަރ މުއާޒް މުހައްމަދު ރަޝީދްގެ އުފަންރަށް ގދ. މަޑަވެލީގަ އެ ކުންފުނިން ހިންގާ އިންޖީނުގޭގައި ވެހިކަލް ދޮންނަ ގަރާޖެއް އެބަ ހިންގަމުންދެއެވެ.

މިކަމެއް މިގޮތަށް ކުރާތާ ދުވަސްގަނޑެއް ވެފަވާކަމަށް އަޅުގަނޑުމެންނަށް މައުލޫމާތު ވަނީ ލިބިފައެވެ.

މި ގަރާޖެއް ހެދިފަހުން މުއާޒްއަށް އެތަނުން އާމްދަނީ ލިބުނު ނަމަވެސް އެކަމުގެ ހުރިހާ އުނދަގުލެއް ކުރަނީ އާންމު ރައްޔިތުންނަށެވެ.

އެކަމާ ޝަކުވާކޮށް ފޭސްބުކުގަ ސްޓޭޓަސް ޖެހި މީހަކު ބުނީ މަޑަވެލި އިންޖީނުގެއަކީ ވެހިކަލް ދޮންނަ ގަރާޖަކަށް ހަދައިގެން މުޅި މަގުމައްޗަށް ތެޔޮ އެޅި ތަޣައްޔަރުވެފަވާ ކަމަށެވެ.

މިކަން މިހެންކުރަމުންދާއިރު މިކަމާމެދު ފިޔަވަޅުއަޅާނެ ބަޔަކުނެތް ކަމަށާ މިފަދަ ކަމެއް ކުރާއިރު އާންމުންނަށް ދިމާވާ އުނދަގޫތަކަށްވެސް ވިސްނާލަންވާނެ ކަމަށް އެމީހާ ބުންޏެވެ.

މަޑަވެލި އިންޖީނުގޭގަ ގަރާޖެއް ހެދިފަހުން އެތަނުގެ ކުރިމަތީގަ އާންމުން ދުއްވަން ބޭނުންކުރާ މަގުގައި އޮންނަނީ ކަޅުތެލުގެ ކޯރެއް ހެދިފައެވެ.

މިކަމާ ހުރެ އާންމުންނަށް ޝަކުވާ ބޮޑުވި މިތަނުންވެސް ފައިސާ ފޮއްޗެއް މުއާޒްގެ ޖީބަށް އިތުރުވާތީ މިކަން ހުއްޓުވާނެހެން ހީނުވެއެވެ.