ނޮޅިވަރަންފަރުގައި ކުރީގެ ސަރުކާރުން އެޅި 60 ހައުސިންގ ޔުނިޓް ރައްޔިތުންނާ ހަވާލުނުކޮށް ފަނާވާން ދޫކޮށްލެވިފައި!

ހދ. ނޮޅިވަރަންފަރުގައި ކުރީގެ ސަރުކާރުން އެޅި 60 ހައުސިންގ ޔުނިޓް ރައްޔިތުންނާ ހަވާލުނުކޮށް ފަނާވަމުންދާތީ ރަށުގެ ރައްޔިތުން ވަނީ އިންތިހާއަށް ކަންބޮޑުވެފައެވެ. މި ހައުސިންގ ޔުނިޓްތަކަކީ ރައްޔިތުންގެ ވަރަށް ބޮޑު އެދުމެއް ކަމަށާއި، ބޯހިޔާވަހިކަމުގެ ދަތިކަމަކީ ރަށުގައި އެންމެ ބޮޑު ތަކުލީފު ކަމަށް ރައްޔިތުން ބުނެއެވެ.

ނޮޅިވަރަންފަރު ކައުންސިލުން މަޢުލޫމާތު ދޭގޮތުގައި މި ޔުނިޓްތައް ރައްޔިތުންނާ ހަވާލުކުރެވެން އަންނަނީ އެ ސަރަހައްދަށް ކަރަންޓުގެ ޚިދުމަތް ގެންދެވިގެންނެވެ. ފެނަކައިގެ އެމްޑީ އެންމެ ފަހުން ވިދާޅުވެފައިވަނީ މިކަމުގެ ޕްރޮކިއުމަންޓް މަސައްކަތް ކުރިއަށްދާ ކަމަށެވެ. ކައުންސިލުން ލަފާކުރާ ގޮތުގައި މި ޔުނިޓްތަކުގެ އެހެން މަސައްކަތްތައް ވަނީ ނިމިފައެވެ. އަދި ކަރަންޓުގެ ކަންތައް ނިންމުމަށް ގާތްގަނޑަކަށް 1 މިލިއަން ރުފިޔާ ޚަރަދުވާނެ ކަމަށް ލަފާކުރެއެވެ.

ހައުސިންގ ޔުނިޓްތައް އަވަހަށް ރައްޔިތުންނާ ހަވާލުކުރުމަށް ރައްޔިތުންދަނީ ތަކުރާރުކޮށް ގޮވާ އަޑުއުފުލަމުން

ނަމަވެސް، މިފަދަ މުހިންމު ކަންކަމަށް ސަރުކާރުން އިސްކަން ނުދީ، މާލެއާއި ސިޔާސީ ވެރިންގެ ހައިބަތު ދެއްކުމަށް ކުރާ ޚަރަދުތަކަކީ ބަލައިގަންނަން އުނދަގޫ ކަމެއް ކަމަށް ރައްޔިތުން ދެކެއެވެ. ނޮޅިވަރަންފަރު ރައްޔިތަކު ބުނީ "އެވެރިންވެސް ޓެކްސް ދައްކާ ކަމަށާއި، ކުރީ ސަރުކާރުން ފަށާ ޕްރޮޖެކްޓެއް ވިޔަސް އަލަށް އަންނަ ސަރުކާރުން ކުރިއަށް ގެންދަންޖެހޭނެ" ކަމަށެވެ. މި ސަރުކާރުގެ ވިސްނުމުގައި އަތޮޅުތެރެ ނެތުމަކީ އަނެއްކާވެސް ތޮއްޖެހުމުގެ ސިޔާސަތު އިތުރުކުރެވުނު ބޮޅެއް ކަމަށް ރައްޔިތުން ދެކެއެވެ.

މި ހައުސިންގ ޔުނިޓްތައް އަވަހަށް ރައްޔިތުންނާ ހަވާލުކޮށް، ބޯހިޔާވަހިކަމުގެ ދަތިކަން ހައްލުކޮށްދިނުމަށް ރައްޔިތުން ވަނީ ސަރުކާރަށް ގޮވާލާފައެވެ.