ގާސިމް ގޮވާލަނީ އިނާޔަތްތައް ދިނުމުގައި ފަގީރުންނާއި މުއްސަނދިން ހަމަހަމަ ކުރުމަށް، އެންމެ ގިނައިން ޓެކްސް ދައްކާ މީހުންނަށް ދައުލަތުގެ އެހީތައް ނުލިބެންވީ ކީއްވެތޯ ސުވާލު ކުރަން ކެރެނީ ވެސް ލަދެއް ނެތީމަ

ސަރުކާރުންދޭ އިންޝުއަރަންސް ފަދަ މާލީ އިނާޔަތްތައް ދިނުމުގައި ފަގީރުންނާއި މުއްސަނދިން ހަމަ ހަމަ ވާން ޖެހޭނެ ކަމަށް ސާދާގަރު ގާސިމް ބުނެފި އެވެ. 

މަޖިލިސް މެމްބަރުންގެ މުސާރައާއި އިނާޔަތްތައް ކުޑަ ކުރުމުގެ ވާހަކަތައް ދެކެވެމުންދާ މި ދަނޑިވަޅުގައި މިއަދު މަޖިލީހުގައި ގާސިމް ބުނީ އެންމެ ގިނައިން ޓެކްސް ފައިސަ ދައްކާ މީހުންގެ ހައިސިއްޔަތުން އެމީހުންނަށް ވެސް އާސަންދަ ފަދަ އިންޝުއަރަންސް އާންމު ރައްޔިތުންނެކޭ އެއް މިންވަރަށް ހައްގު ވާނެ ކަމަށެވެ.

"ކޮބާ ތޯ ހައްގު ނޫން މީހަކީ؟ އެންމެ ގިނައިން ދައުލަތަށް ޓެކްސް ދައްކާ މީހާއަށް ތޯ ދައުލަތުގެ އިނާޔަތްތައް ހައްގު ނުވަނީ؟" އޭނާ މަޖިލީހުގައި ސުވާލު ކުރި އެވެ. 

އޭނާ ވަކާލަތު ކުރަނީ ގާނޫނު އަސާސީގައި އޮންނަ ހަމަހަމަ ކަމަށެވެ. އެހެންނަމަވެސް ހަމަހަމަކަން ނުވަތަ އީކުއާލިޓީ އަކީ އެއްވެސް ބަޔަކު މިއަދު ބަލައިގަންނަމުންދާ ކަމެއް ނޫނެވެ. 

އެންމެން ވެސް ގޮވާލަމުން ދަނީ އިކުއިޓީ އަށެވެ. އެއީ ދެރަ ނިކަމެތި ހާލުގައި އުޅެމުންދާ މީހުންނަށް ބޮޑަށް އެހީތެރިކަން ދީގެން އެމީހުންގެ ފުދުންތެރިކަން އިތުރު ކޮށްދޭނެ ނިޒާމެވެ. ގާސިމް އެ ނިޒާމާ ދެކޮޅެވެ. އެންމެ ދެރަ ނިކަމެތި ރައްޔިތު މީހާއަށް ލިބޭ ސަބްސިޑީ ކޮޅުވެސް އޭނާ ބޭނުންވެ އެވެ. 

މަޖިލީހުގެ މެމްބަރުކަމުގައި މިފަދަ މީހުން ބޭތިއްބުން ހެޔޮ ނުވާނެ އެވެ.