ރަސްމާލެ ޓަނަލް އަޅަން 4 ބިލިއަން ޑޮލަރު ހޯދުމަށް އާންމު ރައްޔިތުންގެ ކާޑުތަކުގެ ލިމިޓް 25 ޑޮލަރަށް ހަދަނީ

ރައީސް މުއިއްޒު ވެރިކަމަށް އައީވެސް ރާއްޖޭގެ ރަށްރަށަށް ތަރައްގީ ނުގެންނާނެ ކަމުގެ ވައުދާއެކުއެވެ. ވެރިކަން ލިބުމާއެކު ބުނަމުން ގެންދިޔައީ ފައިސާ ނެތް ކަމަށާއި ގައުމު ދަރުވާލައިފި ކަމުގައެވެ. ނަމަވެސް އެއާ ވިދިގެން ވަނީ މި ސަރުކާރަށް 500 މިނިސްޓަރުން އައްޔަން ކުރައްވާފައެވެ. އަދި މާލެއާއި މާލެ ސަރަހައްދުގައި އެތައް ބިލިއަން ޑޮލަރެއްގެ ޕްރޮޖެކްޓްތައް އިއުލާންކޮށްފައެވެ. މިއިން އެއް ޕްރޮޖެކްޓަކީ ފުށިދިއްގަރު ފަޅާއި މާލެއާ ގުޅާލުމުގެ ކަނޑުގެ 15 ކިލޯމީޓަރު އަޑީގެ ޓަނަލުގެ ޕްރޮޖެކްޓެވެ. ޕްރޮޖެކްޓް އިއުލާން ކުރަމުން މުއިއްޒު ބުނެފައިވަނީ މި ޓަނަލުން ދާއިރު ކަނޑު އަޑީގެ ހިތްގައިމު މަންޒަރު ފެންނާނެހެން، ޝަބާގެ ރާނީ ހައިރާން ކުރަނިވި ފަދަ ބިއްލޫރި ޓަނަލެއް އަޅުއްވާނެ ކަމަށެވެ. މިއީ ކަނޑު އަޑީގެ 15 ކިލޯމީޓަރު ކަމާއި 200 މީޓަރެއްހާ އަޑިއަށް ދާއިރު މާބޮޑު އިރުގެ އަލިކަމެއް ނުހުންނާނެ ކަމާއި އަދި މިހިސާބުގައި މުރަކައިގެ ފަރުތައް ނޯންނާނެކަން އަދުގެ ރައީސަށް ވިސްނިވަޑައި ނުގަތެވެ.

އެހެންނަމަވެސް ދަރުމަވަންތަ ހޮސްޕިޓަލުގެ 2 އިމާރާތުން 1 އިމާރާތް ދިމްޔާތަށް ގެންދިޔަ ފަދައިން، 15 ކިލޯމީޓަރު ފުންމިނުގެ 4 ބިލިއަން ޑޮލަރުގެ ޓަނަލުން ޖީބަށް ލެވެން އޮތް އެތި ބޮޑުކަމުން މި ޕްރޮޖެކްޓް ކޮންމެހެންވެސް މިވަނީ ހިންގަން ޖެހިފައެވެ.

މިފަހަރު މިކަމަށް ގުރުބާން ކުރަނީ އާންމު ރައްޔިތުންގެ ކާޑުގެ ޑޮލަރު ލިމިޓެވެ. މިގޮތުން ހުރިހާ ކާޑެއްގެ ޑޮލަރު ލިމިޓު 25 ޑޮލަރަށް ކުޑަކުރުމަށް ސަރުކާރުން މިވަނީ ނިންމާފައެވެ.

ޝެއިންއިން ހެދުން ގަނެލައި، އެމޭޒަންއިން ގެޔަށް ބޭނުންވާ އެއްޗެހި ހޯދައި، އެޕަލް ސްޓޯރުން އައިފޯނު ގަތުމުގެ ޒަމާން ދިވެހިންނަށް ނިމުނީއެވެ. ދިވެހިރާއްޖޭގެ މިސްރާބު މިހުރީ ޒިމްބާބުވޭ ފަދަ ގައުމުތަކުގެ ހާލަތާ ދިމާލަށެވެ.