ޝަހީމްގެ ދަރިއާއި ޑރ ވަހީދުގެ ކާފަދަރިއަށް އެމްބަސީގެ ބޮޑެތި މަގާމުތައް، މަހަކު 14،000 އަދި 16،000 ޑޮލަރު - މި މީހުނަށް ޑޮލަރުން މުސާރަ ދޭން އާންމު ރައްޔިތުންގެ ޑޮލަރު ލިމިޓް ކަނޑާލައިފި

މިނިސްޓަރ ޝަހީމްގެ ދަރިއަށާއި ކުރީގެ ރައީސް ޑރ ވަހީދުގެ ކާފަދަރިއަށް މެލޭޝިއާ އަދި ޔޫކޭގެ އެމްބަސީތަކުން ބޮޑެތި މަގާމުތަކެއް ހަމަޖައްސައިފިއެވެ. މި މަގާމުތަކަށް މަހަކު 14،000 އަދި 16،000 އެމެރިކާ ޑޮލަރުގެ މުސާރަ ކަނޑައަޅާފައިވާ ކަމަށް މަޢުލޫމާތު ލިބިފައިވެއެވެ.

މި ފަރާތްތަކަކީ ޑިޕްލޮމެޓިކް ދާއިރާގެ އެއްވެސް އިލްމެއް ނުވަތަ ތަޖުރިބާއެއް ލިބިފައިވާ ބައެއް ނޫން ކަމަށް ވެސް މަޢުލޫމާތު ލިބެއެވެ. އެހެންނަމަވެސް، ސަރުކާރުން އެމްބަސީތަކަށް ގިނަ އަދަދެއްގެ ސިޔާސީ އެކްޓިވިސްޓުން ލަމުން އެބަ ގެންދެއެވެ. މިގޮތުން، ލަންކާ އެމްބަސީގައި 45 މީހުންނާއި މެލޭޝިއާ އެމްބަސީގައި 35 މީހުން މިވަގުތު ތިބި ކަމަށް ވެސް މަޢުލޫމާތު ލިބިފައިވެއެވެ.

މި އެންމެންގެ މުސާރަ ޑޮލަރުން ދިނުމަށްޓަކައި، އާންމު ރައްޔިތުންގެ ޑޮލަރު އެލަވަންސް މިވަގުތު މިވަނީ ކަނޑާލާފައެވެ. މީގެ ތެރޭގައި ރާއްޖެއިން ބޭރުގައި ކިޔަވަން ތިބި ދިވެހި ދަރިވަރުންނަށް ދެމުން އައި ޑޮލަރު އެލަވަންސް ވެސް ހިމެނެއެވެ.

ސިޔާސީ އެކްޓިވިސްޓުންނާއި މިނިސްޓަރުންގެ ދަރިންނާއި ކާފަ ދަރިންނަށް އިލްމާއި ތަޖުރިބާއާއި ނުގުޅޭ މާސިންގާ އެތައް ބޮޑެތި މަގާމުތަކެއް ދިނުމަށް ދިވެހި އާންމު ރައްޔިތުންނާއި ކިޔަވަން ތިބި އެތައް ކުދިންނެއްގެ ތައުލީމު މަހުރޫމު ކުރުމަކީ މުއިއްޒު ސްޕީޑްގައި މިވަގުތު ކުރެވެމުން ދާ ކަމެކެވެ.