ހަތަރު މިލިއަންގެ ދަރަނި ދައްކަން ކުރި ހުކުމަކީ ދިން ޒާތީ ހަމަލާއެއް: އާޒިމާ

މޯލްޑިވްސް އިސްލާމިކް ބޭންކަށް ދައްކަންޖެހޭ ހަތަރު މިލިއަން ރުފިޔާގެ ދަރަނި ދައްކަން ސިވިލް ކޯޓުން ކުރި ހުކުމަކީ އޭނާއަށް ދިން ޒާތީ ހަމަލާއެއް ކަމަށް ވެރިކަންކުރާ ޕީއެންސީގެ ޓިކެޓްގައި މާލޭގެ މޭޔަރު ކަމަށް ވާދަކުރައްވާ އާޒިމާ ޝަކޫރު ވިދާޅުވެއްޖެއެވެ.

ކޯޓަށް ފިލައިގެން އުޅޭ މީހެއް ކަމަށް ސިވިލް ކޯޓުން އިއުލާންކޮށްފައިވާ އާޒިމާ މިފަދައިން ވިދާޅުވީ މިރޭ ބޭއްވި ކެމްޕޭން ޖަލްސާއެއްގައެވެ. އާޒިމާ ވިދާޅުވީ އެ ހުކުމް ކުރީ އޭނާގެ ޣައިރު ހާޒިރުގައި ކަމަށެވެ. އާޒިމާ މިހެން ވިދާޅުވިއިރު، ޣައިރު ހާޒިރުގައި ހުކުމް ކުރުމަކީ އޮންނަ ކަމެކެވެ. މިއީ ރާއްޖޭގައި އަލަށް ކުރި ކަމެއް ނޫނެވެ. 

ޣައިރު ހާޒިިރުގައި އާޒިމާއަށް ހުކުމް ކުރީ އޭނާ ކޯޓަށް ހާޒިރުކުރަން ތަކުރާރުކޮށް ސިވިލް ކޯޓުން ކުރި މަސައްކަތް ނާކާމިޔާބުވުމުންނެވެ. ކޯޓުން ހުކުމް ކޮށްފާނެތީ އާޒިމާ އުޅުނީ ކޯޓަށް ފިއްލަވައިގެނެވެ.

"މިއަދު އަޅުގަނޑު ޒާތީ ދެ ހަމަލާއެއް ތަހައްމަލު ކޮށްފިން. އޭރުވެސް އަޅުގަނޑު ހުރީ ޑޯޓުޑޯ ގަ ދެ ވަޒީރުން އަރިހުގަ އިނގޭތޯ، އަޅުގަނޑަކާ ނުކުޅެވޭނެ،" ކެމްޕޭން ޖަލްސާގައި އާޒިމާ ވިދާޅުވިއެވެ.

އާޒިމާ ވިދާޅުވީ އެ ދަރަނި ރީ ސްޓްރަޗްކާ ކުރަން މިހާރު އިސްލާމިކް ބޭންކަށް ހުށަހަޅާފައިވާނެ ކަމަށެވެ. އެހެންކަމުން އެފަދަ ހާލަތުގައި ހުކުމް ކުރުމުން އޭނާ ކޯފާ އިސްކުރެއްވިއެވެ. އެކަމަކު ކޯފާ އިސްކުރެއްވިޔަސް ކުރާނެ ކަމެއް އެބައޮތްތޯއެވެ. ކޯޓަށް މައްސަލައެއް ހުށަހެޅިއްޖެނަމަ، އެ މައްސަލައެއް ބަލައި އަވަހަށް ހުކުމް އިއްވުމަކީ ގާނޫނުން ފަނޑިޔާރުންގެ މައްޗަށް ލާޒިމްކޮށްފައިވާ ކަމެކެވެ. 

އާޒިމާ އެ ވިދާޅުވާ ފަދަ ރީ ސްޓްރަކްޗާއެއް ކުރާނަމަ، އިސްލާމިކް ބޭންކުން އެ މައްސަލަ އަނބުރާ ނުގެންދިޔައީ ކީއްވެތޯ މިއީ ކުރަންޖެހޭ ސުވާލެކެވެ.