ތުއްތުއަށް ޗިޓް ދިނުން - ފުލުހުން ވެސް މި ބުނަނީ ކައްޒާބަކީ މުއިއްޒުއޭތަ؟

އެމްޑީޕީގެ އެކްޓިވިސްޓް ހުސައިން ޝާފިއު (ތުއްތު) "ކައްޒާބު" ނަމަކަށް ކިޔާ މީހަކަށް ނިސްބަތްކޮށް އެކްސްގަ ކުރި ޕޯސްޓަކާ ގުޅިގެން މާދަމާ ޕޮލިހަށް ހާޒިރުކުރަން ނިންމައިފިއެވެ.

ތުއްތު ޕޯސްޓްކުރީ ފޮއްޓެއް 270 ރުފިޔާ އަށް ގަންނަން ޖެހިގެން އެކަމާ ހިތްހަމަނުޖެހިގެންނެވެ. އެއީ ސިނގިރޭޓު ފޮއްޓެއް ކަމެއް ނުވަތަ އަންނައުނު އަޅާ ފޮއްޓެއް ކަމެއް ނުބުނެއެވެ.

ފޮށި އަގުބޮޑުކޮށްގެން އެރި ރުޅީގަ ކުރި ޕޯސްޓްގަ ތުއްތު ބުނީ ކައްޒާބަށް ބޭލޭނީ އިސްތަށި ކަމަށެވެ. އަދި މަގު މަތިން ފެންނަން ނޭދޭ ކަމަށްވެސް އެ ޓްވީޓްގައި ތުއްތު އެދިފަވެއެވެ.

އެ ޓްވީޓާ ގުޅިގެން ހަޑިހުތުރު ބަސް ބޭނުންކޮށްގެން ބިރުވެރިކަން އުފެދޭ ގޮތަށް އެކްސްގަ ޕޯސްޓްކުރި ކަމަށް ބުނެ ސުވާލުކޮށް ބަޔާނެއް ނެގުމަށް ފުލުސް އޮފީހުން އޭނާއަށްވަނީ ޗިޓް ފޮނުވާފައެވެ.

ހަޑިހުތުރު ބަސް ކަމަށް އެ ބުނަނީ އިސްތަށީގެ ބަދަލުގައި ތުއްތު ބޭނުންކުރި އެއް މާނައެއް ދޭހަވާ އެހެން ބަހަކުންނެވެ. ނަމަވެސް ބިރުވެރިކަން އުފެދުނީ ކީއްވެ ނުވަތަ ކާކުގެ ހިތުގަ ކަމެއް ނޭނގެއެވެ.

ކައްޒާބަކީ ދޮގު ހަދާ މީހުންނަށް އަރަބި ބަހުން ދީފަ އޮންނަ ލަގަބެކެވެ. އެއީ ޔާ ކައްޒާބް މި ގޮތަށެވެ.

ރާއްޖޭގައި މި ނަން ކިޔާ އުޅެނީ މިހާރު ރައީސްކަމަށް އަރާ ހުރި މރ. މުހައްމަދު މުއިއްޒަށެވެ. ސަބަބަކީ މުއިއްޒު ކުރާ ކޮންމެ ކަމެއްވެސް ދިމާ އިދިކޮޅަށް ބަދަލުކޮށް އުބަށް ޖަހާ، ބުނާ ކޮންމެ ބަހެއްވެސް ފަހުން ބަދަލުކުރާތީއެވެ.

މުއިއްޒު ފިޔަވާ ކައްޒާބު މި ލަގަބު ދީފަވާ އިތުރު ދިވެހި އާދަމުގެ ދަރިޔަކު މި އުޑު ދަށުގަ ނެތެވެ. އެހެންކަމުން ތުއްތުގެ ޕޯސްޓްވެސް ކައްޒާބަށް ނިސްބަތްކޮށްފައިވާއިރު ފުލުހުން އެ ޓުވީޓާ ގުޅިގެން ޗިޓު ފޮނުވުމުން އެ އެއްބަސްވެވެނީ ކައްޒާބަކީ މުއިއްޒު ކަމަށް ހެއްޔެވެ؟