އެމެރިކާގެ އަސްކަރީ މަތިންދާ ބޯޓުތައް ރާއްޖެއަށް ނާންނަކަމަށް ބުނެ ރައީސް މުއިއްޒު ހެއްދެވީ ދޮގެއް!

އެމެރިކާގެ އަސްކަރީ މަތިންދާބޯޓުތައް ރާއްޖެއަށް ނާންނަކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދޮގު ހައްދަވާފައިވާ ކަމަށް ބުނެ ބޮޑެތި ފާޑުކިޔުންތަކެއް އަމާޒުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި، ރާއްޖެއަށް އައީ ސިވިލް (މަދަނީ) ބޯޓެއް ކަމަށް ރައީސް ވިދާޅުވި ނަމަވެސް، މިއީ ހަގީގަތާ ހިލާފު ވާހަކައެއް ކަމަށް މަސްދަރުތަކުން ބުނެއެވެ. ރާއްޖޭގެ ޑިފެންސް މިނިސްޓްރީން ކޮންމެ ދުވަހަކު ރައީސަށް އަސްކަރީ ރިޕޯޓުތައް ހިއްސާކުރަމުންދާއިރު، ރޯދަމަހުގެ ދުވާލު މިފަދަ ބޮޑު ދޮގެއް ހެއްދެވުމުން ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.

އެއާޕޯޓުގައި ދިވެހި މުވައްޒަފުން މަސައްކަތް ކުރަމުންދާއިރު، އެއީ ކޮން ކަހަލަ ބޯޓުތަކެއްކަން ދިވެހިންނަށް އޮޅުވައިނުލެވޭނެ ކަމަށާއި، ދިވެހިންނަކީ އެހާ "ގަމާރު" ބައެއް ކަމަށް ރައީސް މުއިއްޒު ހީފުޅުކުރައްވަނީތޯ ސުވާލު އުފެދެއެވެ.

މި މައްސަލަ ފެންމަތިވެފައިވަނީ، އިރާނަށް ދެމުންދާ ހަމަލާތަކާ ގުޅިގެން އެމެރިކާގެ އަސްކަރީ އެއްވެސް މަތިންދާބޯޓެއް ސްޕެއިންގައި ޖެއްސުން ނުވަތަ މަޑުކުރުން އެގައުމުގެ ބޮޑުވަޒީރު ޕެޑްރޯ ސަންޗޭޒް މަނާކުރެއްވުމާ ގުޅިގެންނެވެ. ސްޕެއިންއަކީ ނޭޓޯގެ މެންބަރު ގައުމަކަށް ވީނަމަވެސް، އެގައުމުން ވަނީ އެމެރިކާގެ އަސްކަރީ ބޯޓުތައް ގައުމުން ބޭރުވާން އަންގާފައެވެ.

މައުލޫމާތު ލިބޭ ގޮތުގައި، ސްޕެއިންއިން ބޭރުކުރި އެމެރިކާގެ އަސްކަރީ ބޯޓުތައް ރާއްޖޭގައި ޖެއްސުމުގެ ހުއްދަ މި ސަރުކާރުން ވަނީ ދީފައެވެ. މި ހުއްދަ ދިނުމުގެ ބަދަލެއްގެ ގޮތުން އެމެރިކާއިން ރާއްޖެއަށް 200 މިލިއަން ޑޮލަރުގެ އެހީއެއް ދޭނެ ކަމަށް ވެސް މައުލޫމާތު ލިބެއެވެ. މާލީ ގޮތުން ގައުމު އިނދަޖެހިފައިވާ މި ދަނޑިވަޅުގައި، ފައިސާގެ ބޭނުމުގައި ރައީސް މުއިއްޒު ކޮންމެ ފަދަ ކަމެއްވެސް ކުރައްވައިފާނެ ކަމަށް އިދިކޮޅު ފަރާތްތަކުން ތުހުމަތު ކުރެއެވެ.