އިސްލާމީ ލީޑަރަކު ޝަހީދުކޮށްލުމުން ސަރުކާރު ހަނު: ސައުދީގެ ރުހުން ނުލިބިގެން ބަޔާނެއް ނެރެން ފަސްޖެހޭތީ ގިނަ ބައެއްގެ ފާޑުކިއުން

މިއަދު ދުނިޔެ ހޭލީ އިސްލާމީ އުންމަތުގެ އިސް ލީޑަރަކު، ޔަހޫދީ ޓެރަރިސްޓުންގެ ފިނޑި ހަމަލާއެއްގައި ޝަހީދުކޮށްލި ހިތާމަވެރި ޚަބަރާއެކުގައެވެ. ނަމަވެސް، މި ހިތާމަވެރި ދަނޑިވަޅުގައި ދިވެހި ސަރުކާރުގެ ފަރާތުން އެއްވެސް ބަޔާނެއް ނެރެފައި ނުވާތީއާއި، ރަސްމީކޮށް ތައުޒިޔާ ފޮނުވާފައި ނުވާތީ އާންމުންގެ ބޮޑެތި ފާޑުކިއުންތަކެއް ސަރުކާރަށް ވަނީ އަމާޒުވެފައެވެ.

ގިނަ ބަޔަކު ފާހަގަކުރާ ގޮތުގައި، ކާފަރު ގައުމެއްގެ ވެރިއަކު މަރުވިޔަސް، ދިވެހި ސަރުކާރުން ވަގުތުން ވަގުތަށް ތައުޒިޔާގެ މެސެޖުތައް ފޮނުވައި، ގައުމީ ދިދަ ބައިދަނޑިއަށް ތިރިކުރެއެވެ. ނަމަވެސް، އިސްލާމީ މުޖާހިދު ލީޑަރަކު ޔަހޫދީންގެ ހަމަލާއެއްގައި ޝަހީދުވުމުން ސަރުކާރުން އެއްވެސް ހިލަމެއް ނުވުމަކީ، ގައުމީ ދިދަ ތިރިކުރަނީ ހަމައެކަނި ޣައިރު މުސްލިމް ވެރިންނަށްތޯ އުފެދޭ ސުވާލެކެވެ. މައުލޫމާތު ލިބޭ ގޮތުގައި، ސަރުކާރުން މިކަމުގައި ބަޔާނެއް ނެރުމަށް ފަސްޖެހެނީ ސައުދީ އަރަބިއްޔާގެ ރުހުން މިކަމުގައި ނުލިބިގެންނެވެ.

ރައީސް ޑރ. މުޙައްމަދު މުޢިއްޒުގެ ސަރުކާރަށް ފާޑުކިޔާ ފަރާތްތަކުން ބުނާ ގޮތުގައި، އެމަނިކުފާނަކީ ގައުމިއްޔަތާއި އިސްލާމްދީނުގެ ޗެމްޕިއަނެއްގެ ނަމުގައި، ދީނީ އިލްމުވެރިންގެ ނިވަލުގައި ތިއްބަވައިގެން ވެރިކަމަށް ވަޑައިގެންނެވި ބޭފުޅެކެވެ. ޕޯޑިއަމްތަކުގައި މުޅި ދުނިޔެއަށް ގޮންޖައްސަވައި ވާހަކަފުޅު ދެއްކެވި ނަމަވެސް، އަމަލީ ގޮތުން އިސްލާމީ އުންމަތަށް ދިމާވާ މިފަދަ ބޮޑެތި ކަންކަމުގައި ފެންނަނީ ފިލައި ބޮނދައިގެން ތިއްބަވާ މަންޒަރު ކަމަށް ސޯޝަލް މީޑިއާގައި ގިނަ ބަޔަކު ދަނީ ބުނަމުންނެވެ.

މީގެ އިތުރުން، މި ސަރުކާރުގެ މުގުލުގައި އޮތް ޖަމްޢިއްޔަތުއް ސަލަފަށް ތާއީދުކުރާ ބައެއް ފަރާތްތަކުން، އިޒްރޭލާއެކު ނުކުމެ އިރާނާ ދެކޮޅަށް ހަނގުރާމަ ކުރުމަށް ގޮވާލަމުންދާ ދިއުމަކީ ވެސް ގިނަ ބައެއްގެ ކަންބޮޑުވުން އޮތް ކަމެކެވެ. ރައީސް މުޢިއްޒު ވެރިކަމަށް ގެނައުމަށް އެންމެ އިސްކޮށް މަސައްކަތް ކުރެއްވީ ފަސްޓް ލޭޑީ ސާޖިދާ މުޙައްމަދުގެ ބޭބެ ކަމަށްވާއިރު، ސަލަފް ޖަމާއަތުގެ ނުފޫޒު ސަރުކާރުގެ ސިޔާސަތުތަކަށް ވަރަށް ބޮޑަށް ފޯރަމުންދާ ކަމަށް ސިޔާސީ މަސްރަހު ދިރާސާކުރާ ފަރާތްތަކުން ބުނެއެވެ.

އިސްލާމީ ލީޑަރަކު ޝަހީދުވުމާ ގުޅިގެން ސަރުކާރުން މިހާތަނަށް އެއްވެސް ރަސްމީ ބަހެއް ބުނެފައި ނުވާއިރު، ރާއްޖޭގެ ދީނީ އަދި ގައުމީ ޖަޒުބާތު ހުރި ރައްޔިތުން ދަނީ މިކަމާ ހިތްހަމަނުޖެހުން ފާޅުކުރަމުންނެވެ.