އެމެރިކާ ފުއްދައިދިނީ ސައުދީގެ މުނާފިގު އެދުމެއް؛ ރާއްޖޭގައި "އުންމަތޭ، އުއްމަތޭ" ގޮވި އިލްމުވެރިން ޖަމިއްޔާ ގެއްލިއްޖެ!

އެމެރިކާގެ މަޝްހޫރު ނޫސް "ވޮޝިންގޓަން ޕޯސްޓުން" ހާމަކޮށްފައިވާ ރިޕޯޓަކާ ގުޅިގެން އިސްލާމީ އުންމަތުގެ ތެރޭގައި ބޮޑެތި ފާޑުކިއުންތަކެއް އަމާޒުވެއްޖެއެވެ. އެ ނޫހުން ހާމަކޮށްފައިވާ ގޮތުގައި، ސައުދީ އަރަބިއްޔާއިން ބޭރުފުށުން އިރާނަށް ހަމަލާދިނުމާ ދެކޮޅުކަމަށް ދެއްކި ނަމަވެސް، ސިއްރިއްޔާތުގައި އެމެރިކާގެ ކިބައިން އެދިފައިވަނީ އިރާނަށް ހަމަލާދިނުމަށެވެ.

މިއީ މުސްލިމް އުންމަތުގެ މެދުގައި ފިތުނަ އުފައްދައި، ބައިބައިކުރުމަށް ހިންގާ ވަރަށް ނުރައްކާތެރި މުނާފިގު އަމަލެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ. ދީނީ އަދި ސިޔާސީ ދާއިރާގެ ބައެއް ފަރާތްތަކުން ބުނާ ގޮތުގައި، ސައުދީގެ މިފަދަ މުނާފިގު ވެރިންނާއި، އެމީހުންގެ ހިމާޔަތުގައި ތިބި އިލްމުވެރިންގެ ކިބައިން އިސްލާމީ އުންމަތް ސަލާމަތްވެގެން މެނުވީ މުސްލިމުންނަށް ހަގީގީ ރައްކާތެރިކަމެއް ނެތެވެ.

ރާއްޖޭގެ މަސްރަޙަށް ބަލާއިރު، ކުރީގެ އެމްޑީޕީ ސަރުކާރަކީ "ލާދީނީ" ސަރުކާރެއް ކަމަށާއި ހުޅަނގުގެ ގައުމުތަކާ ގުޅުން ބާއްވާތީ ފަތުވާތައް ނެރުނު އިލްމުވެރިންގެ ޖަމިއްޔާއާއި ޖަމިއްޔަތުއް ސަލަފުގެ އަޑެއް މިއަދު ނީވޭކަން ގިނަ ބަޔަކު ފާހަގަކުރެއެވެ. އޭރު "އުންމަތޭ އުންމަތޭ" ގޮވި 100 އެއްހާ އިލްމުވެރިން މިއަދު ވަނީ މުޖުތަމައުން ގެއްލިފައެވެ. އެބޭފުޅުންގެ ބަހެއް ނުވަތަ އިރުޝާދެއް މިހާރު ފެންނަން އޮތީ ހަމައެކަނި ކުރީގެ ފޮތްތަކާއި ލިޔުންތަކުންނެވެ.

މީގެ އިތުރުން، މި ފަރާތްތަކަށް "ލާދީނީ" ވަނީ ހަމައެކަނި ސައުދީގެ މަސްލަހަތާ ފުށުއަރާ ސަރުކާރުތައް ކަމަށް އާންމުން ދަނީ ތުހުމަތު ކުރަމުންނެވެ. ފާހަގަކޮށްލެވޭ ގޮތުގައި، މި އިލްމުވެރިންނަށް މީގެ ކުރިން ކަމުދިޔައީ ސޫރިޔާގައި އައިއެސްއެސް އިން ކުރި ހަނގުރާމައެވެ. ފަލަސްތީނުގެ ހިތްދަތި ހާލަތަށްވުރެ އެބޭފުޅުންނަށް މުހިންމުވީ އެއީއެވެ. އަދި އެބޭފުޅުންގެ ގާތް މީހުން ނުވަތަ "ބޯއީސް" މެދުވެރިކޮށް އިރާނަކީ ކާފަރުން ކަމަށް ބުނެ ފަތުވާ ނެރުމަކީ މިއަދު އެބޭފުޅުންގެ އާދައަކަށް ވެފައިވާ ކަމަށް ގިނަ ބަޔަކު ބުނެއެވެ.

މި މައްސަލަތަކާ ގުޅިގެން ދިވެހި މުޖުތަމައުގެ ތެރޭގައި ވަނީ މިފަދަ އިލްމުވެރިންގެ އިޚްލާޞްތެރިކަމާ މެދު ސުވާލު އުފެދިފައެވެ. ސައުދީގެ ސިޔާސީ މަސްލަހަތު ހިމާޔަތް ކުރުމަށްޓަކައި މުސްލިމް އުންމަތުގެ އެއްބައިވަންތަކަން ގުރުބާން ކުރަމުންދާ ކަމުގެ ކަންބޮޑުވުން ދަނީ އިތުރުވަމުންނެވެ.