އެންސްޕާގެ 35 މިލިއަން ރުފިޔާގެ ވައްކަން ހާމަވުމާއެކު، މުއިއްޒު ޓީވީއާ އޮތް އެއްބަސްވުން އުވާލަން ނިންމައިފި!

ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އާއި މޯލްޑިވްސް މީޑިއާ ހައުސް (އެމްއެމް ޓީވީ) އާ ދެމެދު ވެފައިވާ އެއްބަސްވުން އުވާލަން ނިންމައިފިއެވެ. މި ނިންމުން އައިސްފައިވަނީ އެންސްޕާގެ 35 މިލިއަން ރުފިޔާގެ ބޮޑު ވައްކަމެއް ހާމަވުމާ ގުޅިގެންނެވެ.
އެންސްޕާއިން މިއަދު ނެރުނު ބަޔާނެއްގައި ބުނެފައިވާ ގޮތުގައި، "މޫކައި ސުއިޓްސް" އިމާރާތް މަރާމާތުކުރުމަށް ހުސްކުރަން ޖެހުމާ ގުޅިގެން، އޭޖެންސީ ހިންގާނެ އައު ތަނެއް ހޯދުމަށް މާލީ ވުޒާރާގެ އޯޕަން ޓެންޑަރ އުސޫލުން ކުރިއަށް ގެންދިޔަ މަސައްކަތުން އެމްއެމް ޓީވީގެ އިމާރާތެއް ހޮވުނެވެ. ނަމަވެސް، މިހާރު މި އެއްބަސްވުން އުވާލުމަށް ނިންމާފައިވާކަން އެންސްޕާއިން ހާމަކޮށްފައިވެއެވެ.
މި މައްސަލައާ ގުޅިގެން ސޯޝަލް މީޑިއާގައި ގިނަ ފާޑުކިޔުންތަކެއް އަމާޒުވެފައިވަނީ އެމްއެމް ޓީވީއަށެވެ. ގިނަ ފަރާތްތަކުން ބުނާ ގޮތުގައި އެމްއެމް ޓީވީއަކީ "މުނާފިޤު މުއިއްޒު ޓީވީ" އެވެ. އަދި މިއީ މުއިއްޒުގެ ދޮގުތައް ތެދުކޮށް، ޕްރޮމޯޓްކުރުމަށް އުފައްދާފައިވާ ޗެނަލެއް ކަމަށް ތުހުމަތުކުރެވެއެވެ.
އިތުރަށް ފާޑުކިޔާ ފަރާތްތަކުން ބުނާ ގޮތުގައި، އެންސްޕާއިން ބަލިމީހުންނަށް ދެމުން ގެންދިޔަ އެހީތެރިކަން ހުއްޓާލާފައިވާއިރު، މަހަކު 580,000 ރުފިޔާއަށް އިމާރާތެއް ކުއްޔަށް ހިފުމަކީ ސުވާލު އުފެދޭ ކަމެކެވެ. މީގެ އިތުރުން، ސިޔާސީ ވަޒީފާތަކާއި ދައުލަތުގެ އިސްރާފު އިތުރުވަމުންދާއިރު، ނިކަމެތި ރައްޔިތުންނަށް ދެމުންދާ ސަބްސިޑީތައް އުނިކުރަމުންދާކަމަށް ފާޑުކިޔާ ފަރާތްތަކުން ބުނެއެވެ.
މި ހާމަވެފައިވާ 35 މިލިއަން ރުފިޔާގެ ވައްކަމާ ގުޅޭ ގޮތުން އިތުރު ތަޙުޤީޤުތައް ކުރިއަށްދާނެ ކަމަށް ބެލެވެއެވެ. އަދި މި މައްސަލައިގެ ސަބަބުން ސަރުކާރުގެ އިތުރު ވުޒާރާތަކަށާއި އިސް ފަރާތްތަކަށް ވެސް އަސަރުކުރާނެ ކަމަށް ސިޔާސީ ދާއިރާގެ ތަޙުލީލުކުރާ ފަރާތްތަކުން ލަފާކުރެއެވެ.