ބައިނަލްއަޤްވާމީ މަޙާސިންތާގައި ފިޝަރީޒް މިނިސްޓަރ ސިޔާމުގެ 'އިތުރުފުޅު': މަސްވެރިންގެ ކަންބޮޑުވުން އިތުރުވެ މުޅިން މާޔޫސްވެއްޖެ!

ފިޝަރީޒް މިނިސްޓަރ އަޙްމަދު ސިޔާމު އިއްޔެ ބޭއްވުނު ބައިނަލްއަޤްވާމީ ސީއޯއެފްއައި 36 ވަނަ މަޙާސިންތާގައި ވާހަކަފުޅު ދައްކަވަމުން ދިވެހިރާއްޖެއަށް މަސް އިމްޕޯޓު ނުކުރާކަމަށް ވިދާޅުވެ ކަނޑައެޅިގެން ދޮގު މަޢުލޫމާތެއް ދެއްވައިފިއެވެ. ބައިނަލްއަޤްވާމީ ފިޝަރީޒް އެންޑް އެގްރިކަލްޗަރ އޮގަނައިޒޭޝަނުން އިންތިޒާމުކޮށްގެން ބޭއްވި މި މަޙާސިންތާގައި ދިވެހިރާއްޖޭގެ ފަރާތުން ވާހަކަފުޅު ދައްކަވަމުން މިނިސްޓަރ ސިޔާމު ވިދާޅުވެފައިވަނީ ރާއްޖެއަށް ހަމައެކަނި އިމްޕޯޓު ނުކުރަނީ މަސްކަމަށެވެ. ނަމަވެސް މިއީ ޙަޤީޤަތާ ޚިލާފު ވާހަކައެކެވެ.

ޙަޤީޤަތުގައި ރާއްޖެއަށް އެންމެ ގިނައިން ކަނޑުމަހުގެ ބާވަތްތައް އެތެރެކުރަނީ ތައިލެންޑުންނެވެ. ތައިލެންޑަކީ ރާއްޖޭގެ ރޯމަސް އެންމެ ބޮޑަށް އެކްސްޕޯޓުކުރާ ޤައުމުކަމާއި، އެ ތަކެތި ވެލިއު އެޑްކުރުމަށްފަހު އަނބުރާ ރާއްޖޭގެ ބާޒާރަށް އޭގެ އަގަށްވުރެ ބޮޑު އަގުގައި އެތެރެކުރާކަން ފާހަގަކުރެވެއެވެ. މީގެ އިތުރުން، ރާއްޖޭގެ ހުރިހާ ރިސޯޓުތަކަށް ބޭނުންވާ 1 ކިލޯގެ މަސްދަޅު އެތެރެކުރަނީ ތައިލެންޑުންނެވެ. މިފްކޯއިން މިކަން ނުކުރަނީ ހެދިފައިވާ ވަކި ޑީލެއްގެ ދަށުން ކަމަށް ތުހުމަތު ކުރެވެއެވެ.

މިނިސްޓަރ ސިޔާމު އިތުރަށް ވިދާޅުވެފައިވަނީ ޤައުމުގެ މަސައްކަތްތެރިންގެ 11 އިންސައްތައަކީ މަސްވެރިންކަމަށާއި، ޤައުމުގެ އިޤްތިޞާދުގެ 6 އިންސައްތައަކީ މަސްވެރިކަން ކަމަށެވެ. ނަމަވެސް މި ވާހަކަފުޅާއި ސަރުކާރުގެ ޢަމަލުތައް ދިމާނުވާކަން ފާހަގަކުރެވެއެވެ. ސަރުކާރުން ވަނީ މަސްވެރިންނަށް ދެމުން އައި ސަބްސިޑީ ކަނޑާލައި، ދޮޅު ކިލޯ ހަމަނުވާ މަހެއްގެ އަގު 7 ރުފިޔާއަށް ކުޑަކޮށްފައެވެ. އަދި މަސްވެރިންނަށް 48 ގަޑިއިރުން ދޭން ބުނި ފައިސާ 14 ދުވަހުން ދޭގޮތައް އުސޫލެއް ހަދާއި އިއްލާނުކޮށްފައެވެ.

އާންމު ރައްޔިތުންގެ ތެރެއިން ގިނަ ބަޔަކު ސޯޝަލް މީޑިއާގައި މިނިސްޓަރުގެ ބަޔާނާމެދު ކަންބޮޑުވުން ފާޅުކޮށްފައިވާއިރު، ސަރުކާރަށް ތާއީދުކުރާ ފަރާތްތަކުން ބުނަނީ މިނިސްޓަރުގެ ބަސްފުޅު އޮޅިގެން ދިޔަ ކަމަށެވެ.