ބަނގުރޫޓުވެފައިވާ ކަމަށް ބުނާ ފެނަކައިން އިންތިހާބާ ދިމާކޮށް އިއުލާނު ކުރުމެއް ނެތި ވަޒީފާތައް ބަހަނީ

ބަނގުރޫޓުވެފައިވާ ކަމަށް ބުނާ ފެނަކައިން މަޖިލިސް އިންތިހާބާ ދިމާކޮށް އިއުލާނު ކުރުމެއް ނެތި ވަޒީފާތައް ބަހަން ފަށައިފިއެވެ. 

އިއްޔެ އެކަނިވެސް އިއުލާން ކުރުމެއްނެތި ފެނަކައިގެ އެކި ބްރާންޗްތަކުން 60 އަށްވުރެ ގިނަ ވަޒީފާ ބަހާފައިވެއެވެ. 

އެގޮތުން ހއ. ބާރަށުން 12 ވަޒީފާ، ނ. ކެނދިކުޅުދޫއިން 7 ވަޒީފާ އަދި ހދ. ކުރިނބީގެ ފެނަކަ ބްރާންޗުން ވެސް 4 ވަޒީފާ ބަހާފައިވާކަން "ދޮންއަމާ"އަށް ވަނީ އެނގިފައެވެ.

މީގެ އިތުރުން މ. ރަތްމަންދޫ ފެނަކަ ބްރާންޗުގައި ހުރި ޑެޕިއުޓީ މެނޭޖަރު އެއް މަސް ވަންދެން ސަސްޕެންޑް ކޮށްފައި ހުރުމަށްފަހު އިއުލާން ކުރުމެއް ނެތި އަދި އިންޓަވިއު ކުރުމެއް ނެތި އާ ޑެޕިޔުޓީ މެނޭޖަރެއް ވެސް ނަގާފައެވެ. އަދި އިތުރު 3 މުވައްޒަފުން ރަތްމަންދޫ ބްރާންޗަށް ނަގާފައިވެއެވެ. 

މުއިއްޒު ވެރިކަމަށް އައިސް ފެނަކައިގެ އާ މެނޭޖިން ޑިރެކްޓަރު މުއާޒް މުހައްމަދު ރަޝީދު ލައްވައި ދެއްކުވި ވާހަކަ އަކީ ފެނަކައަކި ބަނގުރޫޓޫވެފައި އޮތް ތަނެއް ކަމަށް ބުނެ ދެއްކި ވާހަކައެވެ. އަދި ފެނަކައިގެ ހަރަދުތައް ހަމަޖެއްސުމަށް މުވައްޒަފުންގެ މުސާރަ ކުޑަކޮށް، ބައެއް މުވައްޒަފުން ވަކި ކުރަން ޖެހޭނެކަމަށް ބުންޏެވެ. 

މުއާޒް ވަނީ ބައެއް ރަށްތަކުގެ ބްރާންޗުތަކުގައި ތިބީ އެއްވެސް މަސައްކަތެއް ނުކުރާ ބޭކާރު މުވައްޒަފުންތަކެއް ކަމަށް ބުނެފައެވެ. 

އެހެންނަމަވެސް މިއަދު އިންތިހާބާ ދިމާކޮށް ހާމަވެގެން މިދަނީ އޭރު ދެއްކި ވާހަކަތަކަކީ ހުސް ދޮގު ވާހަކަތަކެއް ކަމެވެ. ފެނަކައަކީ އެބުނާ އުސޫލުން ބަނގުރޫޓުވެފައި އޮތް ތަނެއް ނަމަ މިއަދު އެ ސްޕީޑުގައި މުވައްޒަފުން ނެގެމުން ނުދާނެއެވެ.