ޗައިނާ ވައިޓް ހެރޯއިން ނުވަތަ ޗައިނާގެ ވައިޓު ޑުރަގު އަކީ ޖީލެއް ފަނާކުރަން ސަރުކާރަށް އެނގިތިބެ ހިންގާ ޖަރީމާއެއްބާ؟

ޗައިނާގެ އުފެއްދުމެއްކަމަށްވާ "ޗައިނާ ވައިޓް ހެރޯއިން" ރާއްޖޭގައި ދައުރުވާން ފެށިތާ މާގިނަދުވަސް ތަކެއް ނުވިނަމަވެސް، ކުއްލިމަރުތަކުގެ އަސްލަކީ އެއީކަން ސަރުކާރަށް އިނގޭނެ ކަމާއި މެދު އެއްވެސް ސައްކެއްނެތެވެ. ސިއްރުކުރުމަކީ މި ސަރުކާރުގެ ތޮބީއީ ސިފައެއް ކަމުން މިކަންވެސް ސިއްރުކޮށްގެން ތިބީއެވެ.

ޑރ. މުހައްމަދު އަލީ ނުކުމެ މިވާހަކަ ނުދެއްކިނަމަ އަދިވެސް އަހަރުމެން ތިބޭނީ ވާނުވާގައެވެ. ވަނީ ކީކަމެއް، ސަބަބެއް ބުނެދޭނެ އިދާރާއެއް މިސަރުކާރަކު ނެތެވެ. ނަމަވެސް، ޑރ. މުހައްމަދު އަލީ މިވާހަކަ ދެއްކުމާއި ގުޅިގެން ހޯމްލޭންޑް މިނިސްޓްރީން ރޭގައިވަނީ ރާއްޖޭގައި "ޗައިނާ ވައިޓް ހެރޯއިން" ދައުރުވަމުންދާ މިންވަރު އިތުރުވެފައިވާ ކަމަށްބުނެ އާންމުން އެކަމަށް ސަމާލުކަން ދިނުމަށް އެދި އިއުލާނެއް ނެރިފައެވެ. 

ޗައިނާ ވައިޓް ހެރޯއިން އަކީ ޗައިނާގައި ބޭސްފަރުވާގެ ބޭނުމަކަށް އުފައްދައިގެން ތަދުކަނޑުވާ ބާރުގަދަ ޕެއިން ކިލާއެކެވެ. މަސްހޫރު ކޮންޓުރޯ ޑުރަގެއް ކަމަށްވާ މޯފިންއަށް ބުރެ 100 ގުނަ ބާރުގަދަ ކެމިކަލެކެވެ. އާންމުކޮށް މި ބާވަތް ބޭނުންކުރަމުން އަންނަނީ އަސްކަރިއްޔާގައެވެ. 

މަސްތުވާތަކެތި އެތެރެވުން ހުއްޓުވުމަކީ ސަރުކާރު ތަކުން ނުކުޅެދިފައިވާ ކަމެކެވެ. ނަމަވެސް ރައީސް މުއިއްޒުގެ "ގައުމިއްޔަތުން" ހުޅުވާލަ މިދިނީ ރާއްޖޭގެ ކަނޑުގެ ސަރަހައްދެވެ. ރާއްޖޭގެ ކަނޑުގެ ސަރަހައްދު ބަލަހައްޓަން އަވައްޓެރި އިންޑިއާގެ އެހީގައި ހަރުކުރި ރާޑަރުތަކާއި، ވައިގެ މަގުން ޕެޓުރޯލް ކުރަމުން ދިޔަ މަތިންދާ ބޯޓުގެ އޮޕަރޭޝަން ސަސްޕެންޑުކޮށް، މަސްތުވާތަކެތީގެ ބޮޑުނަށް ކަނޑު ހުޅުވާލަ ދިނީއެވެ. ޗައިނާގެ ބޯޓުފަހަރު ރާއްޖެ ސަރަހައްދުގައި މަސްވެރިކަން ކުރުމުގެ ނަމުގައި ދުއްވާ ނަގަނީއެވެ. ބެލޭނެގޮތެއް، ހުއްޓުވާނެ ބަޔަކު ނެތެވެ. މި ނުރައްކާތެރި ޗައިނާ ވައިޓް ހެރޯއިން ރާއްޖެއަށް އެތެރެވަނީވެސް ކަނޑުމަގުންނެވެ.