ފެނަކަ މެނޭޖަރުންނަށް މުއާޒްގެ 2 ކޮއްކޮ: ސްކޭމްގެ ތަޖްރިބާއާއެކު ގަދަޔަށް ކަރަޕްޝަން

ފެނަކަ މެނޭޖިންގ ޑިރެކްޓަރ މުއާޒް މުހައްމަދު ރަޝީދް އެ ކުންފުނީގެ މެނޭޖަރުންނަށް އޭނާގެ 2 ކޮއްކޮ ލައިގެން ބޮޑު އަގުގައި މުދާ ގަންނަމުންދާކަން ފަޅާއަރައިފި އެވެ.

ފެނަކަ ޕްރޮޖެކްޓްސް ޑިޕާރޓްމެންޓްގެ މެނޭޖަރަކަށް އުޅޭ އަލީ ހަމްދޫންއަކީ މުއާޒްގެ ދެބެންގެދެދަރި ކޮއްކޮއެކެވެ. އަދި ޕްރޮކިއޮމަންޓްގެ އެސިސްޓެންޓް މެނޭޖަރަކަށް އުޅޭ އަބްދުﷲ ޒާހިރުއަކީ މުއާޒްގެ އަންހެނުންގެ ކޮއްކޮއެކެވެ.

އަލީ ހަމްދޫން މަސް އަތަށްލައިގެން

މި ދެ މީހުން ގުޅިގެން މާކެޓް ރޭޓަށްވުރެ ދެގުނަ އަގުބޮޑުކޮށް ރޫފިންގ ޝީޓްތަކެއް ގަތްކަމުގެ މައުލޫމާތު، ޕަރޗޭސް އޯޑަރ އާއި ޕޭމަންޓް ވައުޗަރ އަދި ޓްރާންސްފަރ ސްލިޕްއާ އެއްކޮށް އަޅުގަނޑުމެންނަށް ވަނީ ލިބިފައެވެ.

މި މުއާމަލާތުގަ ފެނަކައިން މުދާ ގަނެފަވަނީ އެވޯކާ ކިޔާ ކުންފުންޏަކުންނެވެ. އަޅުގަނޑުމެން ބެލިބެލުމުގަ މި ކުންފުނީގެ ހިއްސާދާރުންގެ ލިސްޓްގަ ހަމްދޫން ނެތަސް އަސްލު ވެރިމީހާއަކީ އެއީއެވެ. މި މުއާމަލާތުގަ ޒާހިރުގެ މަސައްކަތަކީ ޕްރޮކިއޮމަންޓް ތެރޭން ޑީލް އެ ކުންފުންޏަށް ޔަގީންކޮށްދިނުމެވެ.

މުދާ ގަނެފަވާ އަގުތަކަށް ބަލާއިރު 0.40 އެމްއެމް، 20 ފޫޓްގެ ރޫފިންގ ޝީޓެއް އެވޯކާއިން ގަނެފަވަނީ ޓިނުގަނޑަކަށް 1،545.10 ރުފިޔާގެ މަގުންނެވެ. އަދި 0.40 އެމްއެމް، 13 ފޫޓްގެ ރޫފިން ޝީޓެއް ގަނެފަވަނީ 1،004.32 ރުފިޔާއަށެވެ.

މިއީ މާކެޓް ރޭޓަށްވުރެ އެތައް ގުނަ ބޮޑު ރޭޓެކެވެ. އެގޮތުން ހަމައެކަނި އެސްޓީއޯގެ އަގަށް ބެލިޔަސް، ހަމަ މި ބޯމިނުގެ 20 ފޫޓުގެ ޓިނުގަނޑެއް އެސްޓީއޯއިން 900 ރުފިޔާއަށްވުރެ އަގުހެޔުކޮށް އަދި 13 ފޫޓްގެ ޓިނުގަނޑެއް 600 ވަރަކަށް ރުފިޔާ އަށް ލިބެއެވެ.

ބޮޑު އަގުގަ 20 ފޫޓްގެ 10 ޓިނުގަނޑާއި 13 ފޫޓްގެ 104 ޓިނުގަނޑު އެވޯކާ މެދުވެރިކޮށް ފެނަކައިން ވަނީ ގަނެފަ އެވެ.

ޕަރޗޭސް އޯޑަރ

ޕޭމަންޓް ވައުޗަރ

ޓްރާންސެކްޝަން ސްލިޕް

ޕަރޗޭސް އޯޑަރގަ އިތުރަށް ހުރީ ޕީވީސީ ޕައިޕްތަކަކާ ކުލަ ފިހިތަކެކެވެ. މި ތަކެތި ނުލާ ޓިނުގަނޑުތަކަށް އެކަނިވެސް އެއް ލައްކަ ވިއްސަކަށް ހާސް ރުފިޔާ އަރުވާލިއިރު، މާކެޓް ރޭޓްގަ ގަތްނަމަ މި ތަކެއްޗަށް ހަރަދުވާނީ ހަތްދިހަ ވަރަކަށް ހާސް ރުފިޔާ އެވެ.

ޒާހިރާއި ހަމްދޫނަކީ މީގެ ކުރިން ވެސް ޚިޔާނާތުގެ ބޮޑެތި މައްސަލަތަކުގަ ޝާމިލްވާ، ގުޅިގެން ބޮޑެތި ޖަރީމާ ހިންގުމުގެ ތަޖްރިބާހުރި ދެ މީހުންނެވެ. އެގޮތުން ޒާހިރަކީ ކުރިން ބޭންކް އޮފް މޯލްޑިވްސްގަ އުޅެމުން ކަސްޓަމަރުންގެ ގިނަ އަދަދެއްގެ ފައިސާއަށް ޚިޔާނާތްތެރިވެ، އެ ތަނުން ވައްކަންކުރިކަން ފަޅާއަރައިގެން ވަޒީފާއިން ކަނޑާލި މީހެކެވެ.

ޒާހިރު ބެންކުން ބޭރުކުރި ފައިސާއިން ބައެއް ދިނީ ހަމްދޫނާއި ބަރިސްތާގެ އެއް އޯނަރ ވަދީފް ހަސަން ސައީދް ސައީދަށެވެ. މި ދެ މީހުން ގުޅިގެން ސައިކަލްތަކެއް ރާއްޖެއަށް އެތެރެކޮށްގެން އެ ވިއްކުމުގެ ނަމުގަ ސްކޭމް ވިޔަފާރިއެއް ހިންގިކަން އެ ދުވަސްވަރު ފަޅާވެސްއެރިއެވެ.