ހަރަދު ކުޑަ ކުރުމަށް ފިޔަވަޅެއް އެޅުމެއް ނެތި، އާދައިގެ ދެރަ ނިކަމެތި ރައްޔިތުން ވަޒީފާތަކުން ކަނޑަނީ! މި ފަހަރު ފެށީ އާރްޑީސީ މުވައްޒަފުން ވަކި ކުރަން!

ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މުވައްޒަފުން ވަޒީފާއިން ވަކި ކުރުމުގެ މަސައްކަތް ފަށައިފި އެވެ. 

އާރްޑީސީގެ ހުޅުމާލޭ ފެސިލިޓީގެ މަސައްކަތް ހުއްޓާލަނީ ކަމަށް ބުނެ، އެތަނުގައި މަސައްކަތް ކުރާ މުވައްޒަފުން ވަކި ކުރާނެ ކަމަށް އަންގައި މިހާރު ވަނީ މެމޯ އެއް ވެސް ފޮނުވާފަ އެވެ. 

އާރްޑީސީގެ މި އަމަލުގެ ސަބަބުން ގާތްގަނޑަކަށް 100 އަށް ވުރެ ގިނަ އާއިލާ ބިކަ ވާނެ އެވެ. 

ވެރިކަމަށް އައި ގޮތަށް އެންމެ ފުރަތަމަ ދިމާކުރީ ފެނަކަ މުވައްޒަފުންނާ އެވެ. ފެނަކައިން މުވައްޒަފުން ކެނޑުމަށް ފަހު މިހާރު އާރްޑީސީ މުވައްޒަފުންނެވެ. ދެން ކުރިއަށް އޮތީ ކޮން ކުންފުންޏެއް ބާއެވެ؟

2000 އަށްވުރެ ގިނަ ސިޔާސީ މުވައްޒަފުން ލައިގެން ހިންގާ މަތި ބަރު ސަރުކާރަށް މި އުޅެނީ ހިފަހައްޓައި ނުލެވިގެންނެވެ. ހަރަދު ކުޑަ ކުރުމަށް އެއްވެސް ފިޔަވަޅެއް އެޅުމެއް ނެތި އާދައިގެ ނިކަމެތި ރައްޔިތުން ވަޒީފާއިން ވަކި ކުރުމަކީ ބަލައިގަނެވޭނެ ކަމެއް ހެއްޔެވެ؟ 

ކަމެއް ނުކޮށް ތިބޭ ސިޔާސީ މުވައްޒަފުން މަދުކޮށް، އެމީހުންގެ މުސާރައިން އުނި ކުރިއްޔާ މާ ރަނގަޅެއް ނޫން ހެއްޔެވެ؟