އިސްލާމިކް މިނިސްޓަރުގެ ދަރިކަލުން އެންގުރީ ސެފު މާހިލް ޝަހީމު މެލޭޝިއާ އެންބަސީގެ މަޤާމަކަށް

އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދުގެ ދަރިކަލުން މާހިލް ޝަހީމު، މެލޭޝިއާގައި ހުންނަ ދިވެހިރާއްޖޭގެ އެންބަސީގެ ސިޔާސީ މަޤާމަކަށް ހަމަޖައްސައިފިކަމަށް ރައީސް އޮފީހުގެ އިސް މަސްދަރަކުން މިއަދު މައުލޫމާތު ދީފިއެވެ. މި މަސްދަރުން މަޢުލޫމާތު ދެއްވިގޮތުގައި މާހިލް ޝަހީމަށް މުސާރައާއި އެލަވަންސްގެ ގޮތުގައި މަހަކު 120،000 ރުފިޔާ ލިބޭނެއެވެ. އަދި މީގެ އިތުރުން އޭނާގެ އަނބިދަރިންގެ ޚަރަދުތައްވެސް ދައުލަތުން ބަލަހައްޓާނެކަމަށް ވިދާޅުވިއެވެ.

މާހިލް ޝަހީމަކީ މީގެ ކުރިން "އެންގްރީ ޝެފް" ނަމަކަށް ކިޔާ ރެސްޓޯރަންޓެއް ހިންގަމުން އައި ޒުވާނެކެވެ. އިންޓަނޭޝަނަލް ރިލޭޝަންސްގެ ދާއިރާއިން މާބޮޑު ތަޖުރިބާއެއް ނެތް މާހިލަށް މި މަޤާމު ލިބުނީ އޭނާގެ ބައްޕަގެ ނުފޫޒުންކަމަށް ސޯޝަލް މީޑިއާގައި ފާޅުކުރަމުންދާ ޚިޔާލުތަކުން ދޭހަވެއެވެ. މި ޚަބަރާ ގުޅިގެން ގިނަ އާންމު ރައްޔިތުން ކަންބޮޑުވުން ފާޅުކުރަމުންދާއިރު، ސަރުކާރުން ޚަރަދު ކުޑަކުރުމަށް ގޮވާލަމުންދާ މި ދަނޑިވަޅުގައި މިފަދަ ބޮޑު މުސާރައެއް ދިނުމަކީ ބަލައިގަނެވޭނެ ކަމެއް ނޫންކަމަށް ބުނެއެވެ. އަދި ޝަހީމު ފަދަ އިލްމުވެރިއެއްގެ އާއިލާއަށް ޓެކްސް ފައިސާ މިފަދަ ގޮތަކަށް ހަރަދުކުރުމަކީ ދީނީގޮތުން ހުއްދަވާނެ ކަމެއްތޯ ދޮންއަމާ ހިތައް އަރައެވެ.

މި ސަރުކާރުގައި އިސްލާމިކް މިނިސްޓަރު ޑރ. ޝަހީމުގެ އާއިލާއަށް ގިނަ މަންފާތަކެއް ލިބެމުންދާކަން ފާހަގަކުރެވެއެވެ. މިގޮތުން އެމަނިކުފާނުގެ ދޮށީ ދަރިކަލުން ހިންގާ ކުންފުންޏަކަށް ހުޅުމާލެއިން ބިމެއް ލިބިފައިވާ ކަމަށާއި، އަދި އެމަނިކުފާނުގެ ކޮއްކޯފުޅު މިއަހަރުގެ ޙައްޖު ދަތުރުގައި ޙައްޖާޖީންގެ އެހީތެރިއެއްގެ ގޮތުގައި ބައިވެރިވެފައިވާކަންވެސް ފާހަގަކުރެވެއެވެ.