މުއިއްޒު ޕްރޮމޯޓުކުރަން މުއާޒްގެ ޓީވީ ސްޓޭޝަނެއް: އަޑީގަ ހުރީ ހަކުރު ސޭޓް އަރުޝަދް ހާލިދު

މި ވެރިކަމަށް އެންމެ ހަތް މަސް ދުވަހުގެ ތެރޭގަ ފެނަކަ މެނޭޖިންގ ޑިރެކްޓަރ މުއާޒް މުހައްމަދު ރަޝީދު އެ ކުންފުނި މެދުވެރިކޮށް މިލިއަނުން ކަޓު ފައިސާ ނެރެ، ފުޅާ ދާއިރާއެއްގަ މަސްތުވާތަކެތި ހަކުރު ވިއްކާ މީހުންނާ ގުޅިގެން ރައީސް ޑރ. މުހައްމަދު މުއިއްޒު ޕްރޮމޯޓްކުރަން މެންދުރު ޓީވީގެ ނަމުގަ ޓީވީ ސްޓޭޝަނެއް ހަދައިފިއެވެ.

ޓީވީ ސްޓޭޝަން އަދި އެ ސްޓޭޝަންގެ މައި ކުންފުނި ގްލޯބަލް މީޑިއާ ޕްރައިވެޓް ލިމިޓެޑްގެ ރަސްމީ ލިޔެކިޔުމަކުން އެއްވެސް މަގާމެއްގަ މުއާޒް މިހާރުހުރި ކަމަކަށް ނުދައްކައެވެ. އެހެން ނަމަވެސް މީގެ ކުރިން މިއީ މުއާޒް އާއި ރީޖަނަލް އެއާޕޯޓްސްގެ މެނޭޖިންގ ޑިރެކްޓަރ އަހްމަދް މުބީން އާއި އަބްދުﷲ ޔާމީން ރަޝީދުގެ ހިއްސާ އޮތް ތަނެކެވެ.

މި ތިން މީހުންނާ ގުޅުން ހުރި މީހުންގެ ނަން މައްޗަށް ހިއްސާ ބަދަލުކުރީ 10 ޖޫން 2024 ވަނަ ދުވަހުގައެވެ.

އެއީ މުއާޒްގެ އެއްބަނޑު އެއްބަފާ ކޮއްކޮ އީމާން މުހައްމަދު ރަޝީދު، ޔާމީންގެ އަންހެނުން ފާތިމަތު ނަހުފާ އިބްރާހިމް އަދި މުބީންގެ ދައްތަ ފާތިމަތު ޒަރީނާއެވެ.

މެންދުރު ޓީވީގެ ހިއްސާދާރުން

ޔާމީން އާއި އޭނަގެ އަންހެނުން އަދި މިހާރު މެންދުރު ޓީވީގެ ހިއްސާދާރު ނަހުފާ

އީމާން މުހައްމަދު ރަޝީދު މިހާރު ހުރީ ކްލެމެންސީ ބޯޑްގެ ނައިބް ރައީސް ކަމުގައެވެ. މިއީ ސީދާ ރައީސުލްޖުމްހޫރިއްޔާ އައްޔަންކުރާ މެމްބަރެކެވެ. މި މަގާމުގެ މުސާރައަކީ 28500 ރުފިޔާއެވެ. ޓީވީ ސްޓޭޝަނަށް 1 މިލިއަން ޑޮލަރު ހަރަދުކުރިކަމަށް މިކަން އެނގޭ މީހަކު ވަނީ އަޅުގަނޑުމެންނަށް މައުލޫމާތު ދީފައެވެ.

މުއާޒްގެ ކޮއްކޮ އީމާން

މިހާތަނަށް ހޯދުނު މައުލޫމާތުން އެނގޭ ގޮތުގަ ޓީވީ ސްޓޭޝަނެއް ހޯދަން ބޭނުންވާ ހުރިހާ ފައިސާއެއް ހަމަޖައްސައިދިނީ ރާއްޖޭގަ ފުޅާދާއިރާއެއްގަ މަސްތުވާތަކެތީގެ ވިޔާފާރިކުރާ އަދި އެފަދަ މައްސަލަތަކުގަ ހައްޔަރުކުރި ނަމަވެސް، ފައިސާގެ ނުފޫޒުން ޖަލުން ސަލާމަތްވެފައިވާ އަރުޝަދް ހާލިދު (މަގުމަތީ ނަމުން ވަޓަ) އެވެ. އަރުޝަދް ހަކުރު ވިއްކަން ފެށުމުގެ ކުރިން އާމްދަނީ ހޯދީ މީހުންނަށް ބިރުދައްކާ ފައިސާ ފޭރިގެންނާއި ތިޖޫރީ ފަޅާގެންނެވެ.

އަރުޝަދް ކޯޓުން ދޫކޮށްލުމުން ރާއްޖެއެމްވީގަ ޖެހި ހަބަރު

މި ޓީވީ ސްޓޭޝަނަކީ މުއާޒް ފެނަކަ މެދުވެރިކޮށް އަރުޝަދަށް މިލިއަނުން ފައިސާ ހޯދައިދޭތީ އެކަމުގެ ބަދަލުގެ ގޮތުގަ ދިން ކުޑަ ހަދިޔާއެކެވެ.

އަރުޝަދްއާ ގުޅުން އޮންނަ ކުންފުނިތަކުން ފެނަކައަށް ބޮޑު އަގުގަ އަންނަނީ މުދާ ވިއްކަމުންނެވެ. މިކަން މިގޮތަށް ހިނގާކަން ޔަގީންކޮށްދެނީ މުއާޒްއެވެ. އަދި އިތުރު ސެކިއުރިޓީއެއްގެ ގޮތުން އަރުޝަދުގެ ޑްރަގް ނެޓްވޯކްގަ ހިމެނޭ އޭނާގެ ފިރިހެން ޕަރސަނަލް ސެކެޓްރީ މުހައްމަދު ސިދުރަތުއަށް ފެނަކަ ޕްރޮކިއޮމަންޓްގެ މެނޭޖަރއެއްގެ ވަޒީފާ ދިންކަން މީގެކުރިން ދޮންއަމާއިން ވާނީ ހާމަކޮށްދީފައެވެ. ފުލުހުންގެ ތަހުގީގުގަ ބުނީ ސިދުރަތަކީ އަރުޝަދުގެ ހުރިހާ ފައިސާއެއް ބަލަހައްޓާ މީހާ ކަމަށެވެ. އަރުޝަދުގެ ނެޓްވޯކް އަތުލައިގަތްދުވަހު ސިދުރަތުވެސް ހައްޔަރުކުރިއެވެ.

އަރުޝަދްގެ ނެޓްވޯކުން ޕޮލިހުންނަށް އަތުލައިގަނެވުނު މީހުން. ބޮޅު އަޅާފަވަނީ ފެނަކަ ޕްރޮކިއޮމަންޓް މެނޭޖަރ ސިދުރަތު

މުއިއްޒު ޕްރޮމޯޓްކުރަން ޓީވީ ސްޓޭޝަނެއް ހެދުމުގެ ޓާސްކް މުއާޒްއާ ހަވާލުކުރީ މި ސަރުކާރު ވެރިކަމާ ހަވާލުވީގޮތަށެވެ. އެހެންނަމަވެސް މުއާޒް ފެނަކައިން ހޯދާ ކަޓް ފައިސާއިން ޕާސަނަލް އެސިސްޓެންޓް ގޮވައިގެން ދުނިޔެ ބަލަން ދާވަރުން އެކަން އޮތީ ލަސްވެފައެވެ. އެކަމާ ހެދީ މުއާޒް ވަރަށް ބޮޑަށް އަނދާފަ އޮއްވާ ޓީވީ ސްޓޭޝަނަށް ބޭނުންވާ ފައިސާ އަރުޝަދު ހަމަޖައްސާދިނީ އޭނައަށް މުއާޒް ވަފާތެރިކަމުންނެވެ.

ޓީވީ ސްޓޭޝަންގެ އިތުރުން މެންދުރުގެ ނަމުގަ ނޫހެއްވެސް މުއާޒްމެން ހިންގައެވެ. މުއާޒްއަށް ހަވާލުކުރި ޓާސްކަކީ ސަރުކާރާ މުއިއްޒު ޕްރޮމޯޓްކުރުން ނަމަވެސް، އޭގެ ބަދަލުގަ އަމިއްލަ ނޫހުގަ އަމިއްލަ މީހާ އިސްތިހާރުކުރާ މައްސަލައިގަ މުއިއްޒު ހުންނެވީ ނުރުހުންވެފައެވެ.

މި ސަރުކާރުން ވެރިކަމާ ހަވާލުވީއިރުން ފެށިގެން މުއާޒް ފެނަކަ ތެރެއިން ކުރާ ބޮޑެތި ވައްކަން ވަރަށް ތަފްސީލްކޮށް އަންނަނީ ހާމަވަމުންނެވެ. އެއާއެކު މުއާޒްއަކީ މުއިއްޒު ސަރުކާރުގެ ރިހޭ ދަތަކަށް ވިނަމަވެސް، މުއިއްޒްއަށް އެއްވެސް ފިޔަވަޅެއް އަޅަން ނުކެރެއެވެ. އޭގެ ސަބަބުން ސަރުކާރު ކުންފުނިތަކުގެ މެދުގަ ވައްކަންކުރުމުގެ ވާދަވެރި ސަގާފަތެއް ވަނީ އާލާވެފައެވެ.