ޕީއެންސީގެ ޕީޖީލީގުރޫޕުން ކައުންސިލަރުންގެ އަދަދު މަދުކުރަން ގޮވާލައިފި - ސަރުކާރު ޕާޓުނާރ ގާސިމް، މަޖިލިސް މެންބަރުންގެ މުސާރަ ކުޑަކުރުމަށް ދެކޮޅު

މަޖިލީހުގެ މިއަދުގެ ޖަލްސާގައި ޕީއެންސީގެ ޕާލިމެންޓަރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު ވަޑި ފަލާޙް ވަނީ ރަށު ކައުންސިލްތަކުގެ މެންބަރުންގެ އަދަދު މަދުކޮށްގެން ޚަރަދު ކުޑަކުރުމަށް ގޮވާލައިފައެވެ. އެހެންނަމަވެސް މަޖިލީހުގެ މެންބަރުންގެ މުސާރައާއި އިނާޔަތްތައް ކުޑަކުރުމަށް އޭނާ ތާއީދުކުރައްވާ ކަމަކަށް ނުފެނެއެވެ.

އެހެންނަމަވެސް، ސަރުކާރުގެ ޕާޓްނަރު ޖުމްހޫރީ ޕާޓީގެ ލީޑަރު ގާސިމް އިބްރާހީމް ވަނީ މަޖިލީހުގެ މެންބަރުންގެ މުސާރައާއި އިނާޔަތްތައް ކުޑަކުރުމަށް ތާއީދު ނުކުރައްވާނެކަމަށް ވިދާޅުވެފައެވެ. އަދި މިހާރު ލިބޭ މުސާރައަކީ އެކަށީގެންވާ މުސާރައެއް ކަމަށް ގާސިމް ދެކެވަޑައިގަންނަވާކަމަށް ވިދާޅުވިއެވެ. ފާހަގަކޮށްލެވޭ ކަމަކީ، ގާސިމް އިބްރާހީމަކީ ކޮންމެ ސަރުކާރެއް އޮތަސް އެންމެ ބޮޑު މަންފާ ލިބޭ ފަރާތްތަކުގެ ތެރޭގައި ހިމެނޭ ބޭފުޅެއްކަމަށް ބެލެވޭކަމެވެ. މިކަމާ ގުޅިގެން ރައްޔިތުންގެ މެދުގައި ސުވާލު އުފެދެމުންދާކަން ފާހަގަކުރެވެއެވެ.

މީގެ އިތުރުން، އެމްޑީޕީގެ ގަލޮޅު އުތުރު ދާއިރާގެ މެންބަރު މުހައްމަދު އިބުރާހިމް (ކުޑޫ) ވަނީ މަޖިލީހުގެ މެންބަރުންގެ އަދަދު މަދުކުރުމަށާއި، އާބާދީގެ ނިސްބަތުން މެންބަރުން ގިނަކަމަށް ފާހަގަކުރައްވާފައެވެ. އަދި މިކަމުގައި ރައްޔިތުންގެ މަޖިލީސްއިން ކުރާ މަސައްކަތުގައި ފުރިހަމަ ތާއިދު ލިބޭނެކަމަށް ކުޑޫ ވިދާޅުވިއެެވެ.

މި މައްސަލައާ ގުޅިގެން ގިނަ ރައްޔިތުން ކަންބޮޑުވުން ފާޅުކުރަމުންދާއިރު، މަޖިލީސް މެންބަރުންގެ އިޚްލާޞްތެރިކަމާއި ތެދުވެރިކަމާމެދު ސުވާލު އުފައްދަމުންދެއެވެ. ޚާއްޞަކޮށް މާލީ ބަޔާން ހާމަނުކުރާ މެންބަރުންނާ ދޭތެރޭ ރައްޔިތުންގެ އިތުބާރު ގެއްލެމުންދާކަން ފާހަގަކުރެވެއެވެ. މި މައްސަލައަކީ ޤައުމުގެ މާލީ ޙާލަތު ދަށްވަމުންދާ މި ދަނޑިވަޅުގައި ސަރުކާރުގެ ޚަރަދުތައް ކުޑަކުރުމާ ގުޅޭގޮތުން އުފެދިފައިވާ ބަހުސެކެވެ. އެހެންނަމަވެސް މަޖިލީހުގެ މެންބަރުންގެ މުސާރައާއި އިނާޔަތްތައް ކުޑަކުރުމަށް އެއްބަސްވުމެއް ނެތްކަން ފާހަގަކުރެވެއެވެ.