ޤާނޫނުއަސާސީ ހިމާޔަތްކުރުމަށް ދި ޑިމޮކްރެޓްސް އިން އެމްޑީޕީއާ ގުޅޭނެ ކަމުގެ ފެހި ސިގްނަލެއް ދެއްވައިފި!

މިރޭ ބޭއްވުނު ދަ ޑިމޮކްރެޓްސްގެ ޖަލްސާގައި، އެ ޕާޓީގެ މަޑަވެލި ދާއިރާގެ ކުރީގެ މަޖިލިސް މެންބަރު ފިރުޝާން ވިދާޅުވެފައިވަނީ މިހާރުގެ ސަރުކާރުގެ ކަންތައްތައް އިންތިހާއަށް ގޯސްވެފައިވާ ކަމަށާއި، ސަރުކާރު ހަމަބިމަށް ތިރިކުރަން ދަ ޑިމޮކްރެޓްސްއިން ކޮންމެ ފަރާތަކާވެސް ގުޅޭނެ ކަމަށެވެ.

ފިރުޝާން އިތުރަށް ވިދާޅުވި ގޮތުގައި، ސަރުކާރުގެ އަމާޒު ވަނީ ގެއްލިފައެވެ. އަދި ސަރުކާރުން ކުރާ ކޮންމެ ކަމަކުންވެސް ފެންނަނީ އުނބަށް ޖަހާ މަންޒަރު ކަމަށް އޭނާ ވިދާޅުވިއެވެ. މަޖިލީހުގެ މެޖޯރިޓީ ލިބުމުން ވެސް ރައްޔިތުންނަށް އެއްވެސް ލުޔެއް، މަންފާއެއް ލިބިފައިނުވާ ކަމަށް ފިރުޝާން ފާހަގަކުރެއްވިއެވެ.

ފިރުޝާން އިތުރަށް ވިދާޅުވި ގޮތުގައި، އެންމެ ހިތާމަވެރި ކަމަކީ ނިކަމެތި ރައްޔިތުންނަށް އެހީތެރިވުމަށް އުފެއްދި އެންސްޕާއިން ދެމުންދިޔަ އެހީތެރިކަން ހުއްޓާލައި، އެތަން މެދުވެރިކޮށް ޕީއެންސީގެ ޓީވީ ސްޓޭޝަނެއް ހިންގުމަށް މުޢިއްޒު އެދިލެއްވި ގޮތަށް 5 އަހަރުގެ ކުލި އެއްފަހަރާ ދައްކައި ތަނެއް ނަގާފައިވާ ކަމެވެ. މި ދައްކަނީ މަހަކު 580،000.00 ރުފިޔާގެ ކުލި ދައްކާ ވާހަކައެވެ.

ޖަލްސާގައި ވާހަކަދެއްކެވި އެހެން ބޭފުޅުންވެސް ސަރުކާރަށް ގަދައަށް ފާޑުކިޔައި ވާހަކަދެއްކެވިއެވެ. ޚާއްޞަކޮށް، ޤާނޫނުއަސާސީއަށް އިޞްލާޙު ގެނެސް މަޖިލީހުގެ ބާރުވެރިކަން ކަނޑުވާލާފައިވާ ކަމަށް ބުނެ، ޤާނޫނުއަސާސީ ދިފާޢުކުރުމަށް ކުރަންޖެހޭ ކޮންމެ ކަމެއް ކުރާނެ ކަމަށާއި، އެކަމަށްޓަކައި ކޮންމެ ބަޔަކާވެސް ގުޅަންޖެހިއްޖެނަމަ ގުޅޭނެ ކަމަށް ގިނަ ބޭފުޅުން ތަކުރާރުކޮށް ވިދާޅުވިއެވެ.

ނަމަވެސް، ޑިމޮކްރެޓްސްގެ ބައެއް އިސް މަޤާމުތަކުގައި ތިއްބެވި ބޭފުޅުން މިހާރުވެސް ސަރުކާރުގެ ސިޔާސީ މަޤާމުތަކުގައި ތިއްބެވިކަން ފާހަގަކުރެވެއެވެ. މިކަމަކީ ޑިމޮކްރެޓްސްގެ މި އައު ސިޔާސަތާ ފުށުއަރާ ކަމެއްގެ ގޮތުގައި ބައެއް ފަރާތްތަކުން ދެކެއެވެ.

ޑިމޮކްރެޓްސްގެ މި ނިންމުމާ ގުޅިގެން، ކުރިއަށް އޮތް ދުވަސްތަކުގައި ރާއްޖޭގެ ސިޔާސީ މަޝްރަޙުގައި އިތުރު ބަދަލުތަކެއް އަންނާނެ ކަށަވަރެވެ.