ރައީސް އޮފީހުގެ މިނިސްޓަރ ރަމީޒުގެ މައްޗަށް ތަޙުޤީޤުކުރަނީ ބިރުގަންނަވަރުގެ ނުރައްކާތެރި ކަމެއް - ރައީސް މުޢިއްޒުއަށް ގެއްލުނު އެތިކޮޅުބޮޑީ؟

ރައީސް އޮފީހުގެ މިނިސްޓަރ އަލީ ރަމީޒު މިހާރު ހުރީ ބަލަމުންދާ މައްސަލައެއްގައި ތަޙުޤީޤަށް ސަސްޕެންޑް ކުރެވިފައެވެ. ބައެއް ފަރާތްތަކުން ބުނާ ގޮތުގައި އޭނާގެ ޕާސްޕޯޓުވެސް ވަނީ ހިފެހެއްޓިފައެވެ. ރައީސް މުޙައްމަދު މުޢިއްޒުގެ ޑިޖިޓަލް ސޮއި ބޭނުންކޮށްގެން އެތައް ޖަރީމާއެއް ހިންގާފައިވާ ކަމަށް ތުހުމަތު ކުރެވެއެވެ. ރައީސް މުޢިއްޒުގެ އެންމެ އިތުބާރުކުރާ އެއް ބޭފުޅަކީ ރަމީޒުއެވެ. އަދި ހެރިސް އަބްދުﷲ އާއި މުޙައްމަދު ޝާހިދުގެ އިތުރުން ރަމީޒަކީ ރައީސްގެ އަންޑަގްރައުންޑް ޑީލްތަކާއި، ކަޅު ވިޔަފާރިން ލިބޭ ފައިސާ މެނޭޖްކުރާ ފަރާތް ކަމަށް ބުނެވެއެވެ.

މީގެ އިތުރުން، ފައިސާ ނަގައިގެން ސިޔާސީ މަޤާމާއި ފްލެޓާއި ގޯތި ދޫކުރުމުގެ ތުހުމަތުތަކެއްވެސް ރަމީޒުގެ މައްޗަށް ވަނީ ކުރެވިފައެވެ. ރައީސް މުޢިއްޒުގެ ސޮއިކޮށްފައިވާ ސިޓީ ފޮނުވި އަދަދު އަދިވެސް ރައީސް އޮފީހަކަށް ނޭނގޭ ކަމަށް ބުނެވެއެވެ. ރަމީޒުގެ އަނބިކަނބަލުން ޝަމްނާޒު ވަނީ ރައީސް މުޢިއްޒަށް ސިހުރު ހެދުމުގެ ތުހުމަތުގައި ހައްޔަރުކުރެވިފައެވެ. ރަމީޒަކީ ރައީސް މުޢިއްޒުގެ ކަޅުފޮށި ކަމަށް ބެލެވޭއިރު، ރަމީޒުގެ އަނގަ ބަންދުކުރަން ކިހާ މިންވަރަކަށް މުޢިއްޒު ގޮސްދާނެތޯ ސުވާލު އުފެދެއެވެ.

ހުރިހާ ތުހުމަތުތަކާއެކު، ރައީސް މުޢިއްޒުގެ ވެރިކަމުގެ ނިޒާމު ވަނީ ސުވާލުގެ ތެރެއަށް ވެއްޓިފައެވެ. އެންމެ އިތުބާރުކުރާ އެއް ފަރާތް ކަމަށްވާ ރަމީޒުގެ މައްޗަށް މިފަދަ ސީރިއަސް ތުހުމަތުތަކެއް އުފުލިފައިވުމަކީ، ސަރުކާރުގެ އެންމެ މަތީ ފަންތީގައި ހިނގަމުންދާ ކަންކަމާމެދު ރައްޔިތުންގެ ކަންބޮޑުވުން އިތުރުވާނެ ކަމެކެވެ. ރައީސް މުޢިއްޒުގެ ޑިޖިޓަލް ސޮއި ނަހަމަ ގޮތުގައި ބޭނުންކުރެވިފައިވާ ކަމަށް ތުހުމަތުކުރެވޭއިރު، މިއީ ޤައުމުގެ އެންމެ މަތީ ވެރިޔާގެ ބާރު ނަހަމަ ގޮތުގައި ބޭނުންކުރެވިފައިވާކަމުގެ ނުރައްކާތެރި އިޝާރާތެކެވެ. މިކަމުން ދައުލަތުގެ އެންމެ އިސް މަޤާމުގެ އިތުބާރަށް ލިބިދާނެ ގެއްލުމަކީ ކުޑަކުޑަ ކަމެއް ނޫނެވެ.

މި ހުރިހާ ކަމަކުން ޔަޤީންވާ ކަމަކީ ދިވެހިރާއްޖޭގެ އަނދިރިކަމާއި ނާމާންކަން އިތުރުވަމުންދާ ކަމާއި، ދިވެހިން ކާން ބޭނުންވި ރާކެނި މިހާރު ދަނީ ފިހެވެމުން ކަމަށް ބައެއް ފަރާތްތަކުން ދެކެއެވެ.