އާރަށުގައި ހިފަހައްޓައި ސެމްބެ ފެކްޝަނުން ކުރަން އުޅުނު މުޒާހަރާ ފަހު ވަގުތު ހުއްޓުވައިފި – މިއަދު ފަތިހު ސެމްބެ ބަލާ ސިފައިން ދިޔައީ ޕްރޮޓޮކޯލުން ބޭރުން

ސެމްބެ އަށް ނައިބް ރައީސްކަމުގެ މަގާމު ދޭން އެންގީ ސީދާ ރައީސް ޔާމިނުގެ އޯޑަރަށެވެ. މިކަމާ ހުރެ އަބަދުވެސް ސެމްބެއާއި ސެމްބެ ތާއީދު ކުރާ ފަރާތްތަކާ މެދު ރައީސް މުއިއްޒު ބަލަނީ ޝައްކުގެ ނަޒަރަކުންނެވެ. މިގޮތުން ސެމްބެ ގެ ތާއީދާއެކު ޕީއެންސީ ޓިކެޓް ނެގި މަޖިލީހުގެ އެތައް ފަރާތްތަކެއް ވާދަކުރާ ދާއިރާތަކަށް ސީދާ މުއިއްޒުގެ އިރުޝާދުގެ ދަށުން ވަނީ އަމިއްލަ ކެންޑިޑޭޓުން ނުކުމެ އެ މީހުންގެ ކެމްޕޭނަށް މިނިސްޓަރުން ފޮނުވާފައެވެ.

މުއިއްޒުގެ މެނިފެސްޓޯގައި ލިޔެފައިވަނީ ވާނުވާ ބަންދު ނިމުމަކަށް ގެނެސްދޭނެކަމަށް

މިއަދުގެ ވަގުތެއްގައި ސެމްބެއަށް ތާއީދުކުރާ ގިނަ އަދަދެއްގެ ޒުވާނުން ދިޔައީ ވާނުވާ ޖެހުން ހުއްޓުވުމަށް ގޮވާލައި އެއްވުމެއް ބާއްވަމުން ތައްޔާރުވަމުންނެވެ. މިކަން ކޮށްފައިވަނީ ކައުންސިލުން ހުއްދަ ލިބިގެން އަދި ފުލުހުންގެ ހުއްދައާވެސް އެކުއެވެ. އެހެންނަމަވެސް އެއްވުމުގެ ވަގުތު ކޮޅެއް ކުރިން ސީދާ ރައީސް މުއިއްޒުގެ އެންގުމަށް ފުލުހުން ވަނީ މި އެއްވުން ނުބޭއްވޭނެ ކަމަށް އަންގައި މިކަމުގައި ބައިވެރިވާ ފަރާތްތައް ހައްޔަރު ކުރާނެ ކަމުގެ އިންޒާރު ސީދާ ލިޔުމުން ދީފައެވެ. މިއީ ރާއްޖޭގެ ސިޔާސީ މަސްރަހު އެންމެ ހޫނުވާ ދުވަސްކޮޅުވެސް ފުލުހުން އަމަލު ނުކުރާ ފަދަ ހަރުކަށި ގޮތެކެވެ.

ވާނުވާހުއްޓުވަން ޖެހޭކަމަށް ބުނެ ކުރަން ރޭވީ މުޒާހަރާއަަށް ފުލުހުން ހުރަސްއެޅި

މިކަމާ މިހާރުވެސް ގިނަ އަދަދެއްގެ ޒުވާނުން ދަނީ ކަންބޮޑުވުން ފާޅުކުރަމުންނެވެ. އަދި މިއަދުގެ ފަތިހުގެ ވަގުތެއްގައި ނައިބު ރައީސް އާންމުކޮށް ދަތުރު ކުރާ ކާރު ނޫން ސިފައިންގެ ކާރެއްގައި ސެމްބެ ވަނީ އާރަށަށް ގެންގޮސްފައެވެ. މިކަން ހިނގި ގޮތް އެނގޭ ފަރާތަކުން މައުލޫމާތު ދިން ގޮތުގައި ސިފައިން ނައިބް ރައީސް އުޅުއްވާ ގެކޮޅަށް ގޮސް ސެމްބެ ހުރި ގޮތަކަށް ނުކުމެ ކާރަށް އަރަން އެންގިއެވެ. އަދި ލައިގެން ހުރި އެއްޗެހި ބަދަލުކުރަންވެސް ފުރުސަތެއް ނުދީ އަދި އިތުރު އެއްޗެއް ގެންދާނެ ފުރުސަތެއްވެސް ދީފައެއް ނުވެއެވެ. އެނގިފައިވާ ގޮތުގައި ސެމްބެ ވަނީ މިއަދު ކުރިއަށްދާ އެއްވުމުގައި ބައިވެރިވެ ވާހަކަ ދެއްކުމަށް ނިންމާފައެވެ. މިކަމާ ގުޅިގެން ޒުވާނުންގެ މެދުގައި ސެމްބެގެ ތާއީދު ބޮޑުވެ ޕާޓީ ތެރެއިންވެސް ރައީސް މުއިއްޒު އަޒުލުކުރަން ވޯޓު ދީފާނެކަމުގެ ބިރު މުއިއްޒަށް ވަނީ ބޮޑު ވެފައެވެ. މިވަގުތު ޕީއެންސީގެ ގިނަ މަޖިލިސް މެންބަރުގެ ތާއީދު އޮތީ ސެމްބެ ރައީސް ކަމުގެ ހުވާ ކުރުމަށް ކަމަށް އެނގިފައިވެއެވެ.

މިހެން މިކަން އޮތުމުން މިކަން ވަކި ކޮޅެއްގައި ނުޖެހެނީސް ސެމްބެއަށް އާރަށުން ފުރުން މަނާ ކޮށްފައިވާކަމަށް މައުލޫމާތު ލިބެއެވެ.