ޝަހީމްގެ ދަރިފުޅަށް އެއް ލައްކަ ރުފިޔާ ލިބޭ ވަޒީފާއެއް، ޝަހީމްގެ ކޮއްކޮއަށް ވެސް ސިޔާސީ މަގާމެއް - ޝަހީމް ބުނަނީ ނާޖައިޒު ގޮތުގައި ހޯދި ވަޒީފާތަކެއް ނޫން ކަމަށް

އިސްލާމިކް މިނިސްޓަރު މުހައްމަދު ޝަހީމް އަލީ ސައީދުގެ އާއިލާ މީހުންނަށް ބަރިބަރިއަށް ބޮޑެތި މުސާރަތައް ލިބޭ ވަޒީފާތައް ހަމަޖައްސަން ފަށައިފި އެވެ. 

އޭނާގެ ދަރިފުޅު މާހިލް ޝަހީމްއަށް އެއް ލައްކަ ރުފިޔާއަށް ވުރެ ބޮޑު މުސާރައެއް ލިބޭ ވަޒީފާއެއް މެލޭޝިޔާގެ އެމްބަސީއިން ވަނީ ހަމަޖައްސާފަ އެވެ. މި މުސާރައިގެ އިތުރުން މާހިލް ޝަހީމްގެ ދަރިފުޅަށް ވެސް ހާއްސަ އެލަވަންސްއެއް ހަމަޖެހިފައިވެ އެވެ. 

މާހިލް ޝަހީމްއަށް މި ވަރުގެ މުސާރައެއް ދެވޭ އިރު އޭނާގެ އުމުރުން އެންމެ 21 އަހަރެވެ. އޭނާގެ އެއްވެސް ތައުލީމީ ފެންވަރެއް ވެސް ނެތެވެ. ދެން އޭނާ އަށް މި ވަޒީފާ ހައްގުވީ ކިހިނެއް ހެއްޔެވެ؟ މި ރާއްޖޭގައި މަތީ ފެންވަރަށް ކިޔަވައިގެން ތިބެ ވަޒީފާއެއް ނުލިބި ނުވަތަ އާދައިގެ ދެރަ މުސާރައެއްގައި ކިތަން ޒުވާނުން އެބަ ތިބި ހެއްޔެވެ؟

ޝަހީމްގެ ކޮއްކޮ އަހުމަދު ޝިފާޒަށް ވެސް މަހަކު 30،000 ރުފިޔާ ލިބޭ ޑެޕިޔުޓީ މިނިސްޓަރުގެ މަގާމެއް އޮތީ ހަމަޖައްސާފަ އެވެ. 

މީގެން އެއްވެސް ކަމެއް ޝަހީމް ދޮގުކޮށްފައެއް ނެތެވެ. އޭގެ ބަދަލުގައީ އޭނާ މިކަން ދިފާއުކޮށް މި ވަޒީފާތަކަކީ ހައްގު ވަޒީފާތަކެއް ކަމަށް ބުނެފައިވެ އެވެ. އެމީހުންނަށް މި ވަޒީފާތައް ހައްގުވީ ޝަހީމްގެ އާއިލާ މީހުންނަށް ވުމުން ހެއްޔެވެ؟

ސަރުކާރުގެ މަގާމުތައް އާއިލާ މީހުންނަށް ބަހައި ހުސް ކޮށްފި އެވެ. އާއިލާ މީހުންނަށް މުސާރަ ދީފައި އިތުރު ކަމެއް ކުރާނެ ފައިސާއެއް ދައުލަތުގައި ނެތެވެ.