ބިލެތްދޫ ބައި-އިލެކްޝަން: އެމްޑީޕީ ކެންޑިޑޭޓަށް ތާއީދުކުރާ ފެނަކަ މުވައްޒަފެއް ސަސްޕެންޑްކުރުމާއެކު، ވަޒީފާގެ ވަޢުދުތަކާއި ބިރުދެއްކުން އިންތިހާއަށް!

ފ. ބިލެތްދޫ ކައުންސިލް ރައީސްކަމަށް ބޭއްވޭ ބައި-އިލެކްޝަނާ ގުޅިގެން އެރަށުގައި ސިޔާސީ ނުފޫޒު ފޯރުވުމުގެ ޢަމަލުތައް ހިންގަމުންދާކަމުގެ ތުހުމަތުތައް އިތުރުވަމުންދާ ކަމަށް ވަނީ ފާހަގަކުރެވިފައެވެ. މިގޮތުން އެންމެ ފަހުން ހާމަވެފައިވާ މަޢުލޫމާތުގައިވާ ގޮތުން، އެމްޑީޕީގެ ކެންޑިޑޭޓް ޝާއިލް މާހިރަށް ތާއީދުކުރާތީ ކަމަށް ބުނެ، ފެނަކަ ކޯޕަރޭޝަންގެ ބިލެތްދޫ ސްޓޭޝަން މެނޭޖަރ އަޙްސަން ޙުސައިން ވަޒީފާއިން ސަސްޕެންޑްކޮށްފިއެވެ.

މި މައްސަލައާ ގުޅޭގޮތުން ލިބިފައިވާ މަޢުލޫމާތުގައިވާ ގޮތުން، އަޙްސަން ޙުސައިން ބަލަމުންދާ މައްސަލައަކާ ގުޅިގެން ކަމަށް ބުނެ އޭނާ ވަޒީފާއިން ސަސްޕެންޑްކޮށްފައިވީ ނަމަވެސް، މީގެ ފަހަތުގައި ސިޔާސީ ބޭނުމެއް އޮތް ކަމަށް ތުހުމަތުކުރެވެއެވެ. އަޙްސަން ޙުސައިނަކީ އެމްޑީޕީގެ ކެންޑިޑޭޓް ޝާއިލް މާހިރަށް ތާއީދުކުރާ ފަރާތެއްކަން އެނގިފައިވާތީ، މި ސަސްޕެންޝަނަކީ އޭނާގެ ސިޔާސީ ތާއީދާ ގުޅުވައިގެން އަޅާފައިވާ ފިޔަވަޅެއް ކަމަށް ގިނަ ފަރާތްތަކުން ދެކެއެވެ.

މީގެ އިތުރުން، ނިމިދިޔަ މަޖިލިސް އިންތިޚާބުގައި ބިލެތްދޫ ދާއިރާގެ ގޮނޑި ކާމިޔާބު ކުރުމަށްޓަކައި 30 މީހަކަށް ވަޒީފާ ދިން ކަމަށާއި، ނަމަވެސް މި މީހުން އަދިވެސް ދާއިމީ މުވައްޒަފުންގެ ގޮތުގައި ނުތިބޭ ކަމަށް ބުނެވެއެވެ. އަދި މިފަހަރުގެ ބައި-އިލެކްޝަނަށް އަމާޒުކޮށް އިތުރު ވަޒީފާތަކެއް ދިނުމަށް ނިންމާފައިވާ ކަމަށްވެސް މަޢުލޫމާތު ލިބިފައިވެއެވެ.

ސަރުކާރުގެ ކެންޑިޑޭޓަށް ދިމާވެފައިވާ އެއް ގޮންޖެހުމަކީ ކުރީގެ އިންތިޚާބުގައި ވަޒީފާ ދޭނެ ކަމަށް ބުނި ގިނަ ބަޔަކަށް އަދިވެސް ވަޒީފާ ނުދެވި އޮތުން ކަމަށް ބެލެވެއެވެ. މިކަމާ ގުޅިގެން، ސަރުކާރު ކުންފުނިތަކުން އިތުރު ވަޒީފާތައް ދިނުމުގައި ގޮންޖެހުންތަކެއް ހުރި ކަމަށްވެސް ފާހަގަކުރެވެއެވެ.

މި ހުރިހާ ކަމަކީވެސް އިންތިޚާބީ ޑިމޮކްރަސީގެ ހަމަތަކާ ޚިލާފު ކަންކަން ކަމަށް ދިވެހި ރައްޔިތުންގަބޫލު ކުރެއެވެ. އިލެކްޝަންސް ކޮމިޝަނުން މިފަދަ ޝަކުވާތައް ބަލައި، އިންތިޚާބު ވާދަވެރި އަދި އިންސާފުވެރި މާޙައުލެއްގައި ބޭއްވުމަށް މަސައްކަތްކުރަމުންދާ ކަމަށް ބުނެފައިވީ ނަމަވެސް، ގިނަ ފަރާތްތަކުން ގޮވާލަނީ މިފަދަ މައްސަލަތައް ތަޙްޤީޤުކޮށް، ޤާނޫނީ ފިޔަވަޅު އެޅުމަށެވެ.