ފެނަކަ ޕްރޮކިއޮމަންޓް މެނޭޖަރ ސިދުރަތުގެ މަސްލަހަތު އޮންނަ ކުންފުންޏަކުން ފެނަކައަށް މުދާ ވިއްކާކަން ފަޅާއަރައިފި

މާލިއްޔަތު ޤާނޫނާއި ޤަވައިދުތައް ބޮލާލާޖެހުމަށްފަހު ހަކުރު ސޭޓް އަރުޝަދް ޚާލިދްގެ ނެޓްވޯކްގަ އުޅޭ ފެނަކަ ޕްރޮކިއޮމަންޓް ޑިޕާޓްމަންޓްގެ މެނޭޖަރ މުހައްމަދު ސިދުރަތުގެ މަސްލަހަތު އޮންނަ ކުންފުންޏަކުން ފެނަކައަށް ބޮޑު އަގުގައި މުދާ ވިއްކާކަން ފަޅާއަރައިފިއެވެ.

ޑިވިއަން ޕްރައިވެޓް ލިމިޓެޑް (ޑިވިއަން ހޯލްޑިންގްސް) ނަމަކަށް ކިޔާ ކުންފުންޏަކުން ފެނަކައަށް ހަދާފައިވާ ޕަރޗޭސް އޯޑަރެއް އަޅުގަނޑުމެންނަށް ވަނީ ލިބިފައެވެ.

ޑިވިއަން ޕްރައިވެޓް ލިމިޓެޑް ނުވަތަ ޑިވިއަން ހޯލްޑިންގްސްއަކީ 1 ޖުލައި 2021 ވަނަ ދުވަހު ރެޖިސްޓްރަރ އޮފް ކޮމްޕެނީޒުން އުވާލި ކުންފުންޏެކެވެ. އަލުން ރަޖިސްޓްރީ ކުރީ މި އަހަރު ކުރީކޮޅުގައެވެ.

1 ޖުލައި 2021ވަނަ ދުވަހު އުވާލި ކުންފުނިތަކުގެ ލިސްޓްގަ ޑިވިއަން ހޯލްޑިންގސް

މިހާރު އެ ކުންފުނީގެ ޑިރެކްޓަރުންނާ ހިއްސާދާރުންނަށް ތިބީ މުހައްމަދު ފަޒީލް ކިޔާ މީހަކާއި ސާއިފް އަހްމަދު ކިޔާ މީހެކެވެ.

 

އެ ކުންފުނީގެ މެނޭޖިންގ ޑިރެކްޓަރަކީ ފެނަކަ ޕްރޮކިއޮމަންޓް މެނޭޖަރަކަށް އުޅޭ ސިދުރަތުއެވެ.

ސިދްރަތުގެ ލިންކްޑްއިން ޕްރޮފައިލް

އަޅުގަނޑުމެންނަށް ލިބުނު ޕަރޗޭސް އޯޑަރއަކީ ތ. ތިމަރަފުށި ބްރާންޗްއަށް ފޮނުވަންވެގެން 18 ސެޕްޓެމްބަރު 2024 ވަނަ ދުވަހު ހަދާފައިވާ ޕަރޗޭސް އޯޑަރއެކެވެ.

ސިދްރަތުގެ ކުންފުނިން މުދާ ގަންނަން ފެނަކައިން ހެދި ޕަރޗޭސް އޯޑަރ

މި ޕަރޗޭސް އޯޑަރ އެޕްރޫވް ކުރީ ފެނަކަ ޖަރީމާތަކުގަ އިސް ދައުރެއް އަދާކުރާ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ ހުސެން ޒުހުރީއެވެ.

ސިދުރަތު ފެނަކަ ޕްރޮކިއޮމަންޓް މެނޭޖަރެއްގެ ވަޒީފާއަށް ވަނީ މި އަހަރުގެ ޖެނުއަރީގައެވެ. އެ ވަޒީފާއަށް ވަދެ އެންމެ ދެ މަސް ތެރޭގަ އޭނާ އަގުބޮޑު ކާރެއް ގަތްކަން އަޅުގަނޑުމެންވާނީ ހެއްކާއެކު ސާބިތުކޮށްދީފައެވެ.

ސިދުރަތަކީ ފުޅާދާއިރާއެއްގަ ރާއްޖޭގެ ހަކުރު ވިއްކާ ހަކުރު ސޭޓް އަރުޝަދް ހާލިދުގެ ފިރިހެން ޕަރސަނަލް ސެކެޓްރީއެވެ. 119 ކިލޯގެ މަސްތުވާތަކެތީގެ މައްސަލައެއްގަ އަރުޝަދްއާއެކު ހައްޔަރުކުރި އޭނާގެ ނެޓްވޯކްގެ މީހުންގެ ތެރޭގަ ސިދްރަތު ވެސް ހިމެނެއެވެ. ފުލުހުން މީގެ ކުރިން ބުނީ އަރުޝަދްގެ ނެޓްވޯކުގަ ސިދުރަތަކީ ހަކުރު ވިއްކާގެން ލިބޭ ފައިސާ މެނޭޖްކުރަން ހުންނަ މީހެއް ކަމަށެވެ.

އަރުޝަދް ޚާލިދު (އެންމެ މަތިން ވާތްފަރާތު ކަނުގަ ބޮޑުކޮށް) ހިންގާ ހަކުރު ނެޓްވޯކުން އަތުލައިގަތް މީހުންގެ ތެރޭގަ ސިދުރަތު (ރަތްކުލައިން ބޮޅެއް އަޅާފަ). މި ގްރޫޕް ހައްޔަރުކުރީ 119 ކިލޯ ހަކުރު މައްސަލައެއްގަ

ސިދްރަތު ފެނަކައަށް ވެއްދީ ވެސް އަރްޝަދު ފެނަކަ މުއާޒް ގާތުގަ ބުނެގެން އަރްޝަދުގެ ކުންފުނިތަކަށް ޑީލްތައް ހޯދުމުގެ މަގްސަދުގައެވެ.

ސިދުރަތު ފެނަކަ ޕްރޮކިއޮމަންޓް މެނޭޖަރެއްގެ ގޮތުގަ ހުރެ އޭނާގެ މަސްލަހަތު އޮންނަ ކުންފުންޏަކުން ފެނަކައަށް މުދާ ގަތުމަކީ މާލިއްޔަތު ގަވާއިދާ ގާނޫނާ ކަނޑައެޅިގެން ހިލާފު ކަމެކެވެ. އެހެން ނަމަވެސް ސިދުރަތާއި މުއާޒް ހިމެނޭ ގޮތަށް އަރުޝަދް ހަކުރު ފައިސާ ދޮންނަން ވިޔަފާރިކުރަމުންދަނީ ގާނޫނުތަކަށް ވުރެން މަތިންނެވެ.

ގިނަ އަދަދެއްގެ ކަރަޕްޝަން ޑީލްތައް ފަޅާއެރިނަމަވެސް މިކަމާމެދު އެއްވެސް ފިޔަވަޅެއް ނާޅަނީ މުއިއްޒުގެ ކެމްޕޭނަށް އަރުޝަދްގެ ހަކުރު ފައިސާއިން ގިނަ އަދަދެއް ހަރަދުކޮށްދީފަ އޮތުމުންނެވެ.