މާވޯޓާ ޝަރީފް ރުޅި އައީ ޕްރައިމަރީއަކާ ނުލައި ޓިކެޓް ނުދީގެން

ރައްޔިތުންގެ މަޖިލީހުގެ މަރަދޫ ދާއިރާގެ އިއްޒަތްތެރި މެމްބަރު އިބްރާހީމް ޝަރީފް (މަވޯޓާ ޝަރީފް) އެމްޑީޕީ ދެކެ ރުޅިއައިސް ޕާޓީން ވަކިވީ ޕްރައިމަރީއަކާ ނުލައި ކުރިއަށް އޮތް މަޖިލިސް އިންތިޚާބުގެ ޓިކެޓް އޭނާއަށް ނުދިނުމުންކަން ހާމަވެއްޖެއެވެ.

ދޮންއަމާއާ ވާހަކަދެއްކެވި އެމްޑީޕީގެ އިސް ބޭފުޅަކު ވިދާޅުވީ މަވޯޓާ ޝަރީފް ބޭނުންވަނީ ޕްރައިމަރީއަކާ ނުލައި މަރަދޫ ދާއިރާގެ އެމްޑީޕީ ޓިކެޓް ކަމަށެވެ. ނަމަވެސް އެއީ ފެށުނީއްސުރެ މިއަދާހަމައަށް އެ ޕާޓީން އަމަލުކުރަމުން އައި ޑިމޮކްރެޓިކް ހަމަތަކާ މުޅިން ޚިލާފު ކަމެއް ކަމުގައިވާތީ، އެފަދައިން ޓިކެޓް ދެވެން ނެތްކަން އެންގުމުން ޝަރީފް ކޯފާވީ ކަމަށް އޭނާ ވިދާޅުވިއެވެ.

"އެމްޑީޕީއަކީ ޑިމޮކްރެޓިކް އުސޫލުތައް މުގުރާނެ ޕާޓީއެއް ނޫން. ރައީސް ސޯލިހަށް ވެސް ރިޔާސީ ޓިކެޓް ދިނީ ޕްރައިމަރީ ވިން ކުރުމުން. އެންމެނާ މެދުވެސް އަމަލުކުރެވޭނީ އެއް ހަމައަކުން،" އޭނާ ވިދާޅުވިއެވެ.

އެމްޑީޕީން ވަކިވެވަޑައިގަތްފަހުން މަވޯޓާ ޝަރީފް ޕީޕީއެމްގެ ބައެއް ބޭފުޅުންނާ ބައްދަލުކުރެއްވި ފޮޓޯތަކެއް ސޯޝަލް މީޑިއާގައި ވަނީ އާންމުވެފައެވެ.

ރައީސް ސޯލިހު މެލޭޝިޔާގެ ޑެޕިއުޓީ އެމްބެސެޑަރަކަށް އައްޔަން ކުރެއްވި މަވޯޓާ ޝަރީފްގެ ދަރިކަލުން މަރިޔަމް މިޒްނާ ޝަރީފް އެ މަގާމުގައި ބެހެއްޓުމުގެ މުއްދަތު އިތުރުކުރަން ރައީސް މުއިއްޒު މިހާރު ވަނީ ނިންމަވައި އެކަން އަންގަވާފައެވެ.

މިކަންކަން ފޮރުވުމަށް މަވޯޓާ ޝަރީފް ވިދާޅުވިކަމަށް ބުނެ އަޑުފަތުރަމުން ދަނީ އޭނާ ސިޔާސީ މަސައްކަތްތަކުން ރިޓަޔާ ކުރެއްވީ ކިަމަށެވެ. ނަމަވެސް ހަގީގަތަކީ މިއީއެވެ. ނޫސްވެރިންގެ ފޯނުތަކަށް ވެސް އޭނާ ޖަވާބެއް ނުދެއްވައެވެ.