އުރީދޫ ކަލާރަންގައި ސަރުކާރުގެ އިސްވެރިން ބައިވެރިވުމުން ޕީއެންސީ ރޯވެއްޖެ - ޕާޓީގެ އެތެރޭގެ ހޫނު ބަހުސް ލީކްވެ، ސިޔާސީ މައިދާން ހަލަބޮލިވެއްޖެ

ލާމު އަތޮޅުގައި ބޭއްވުނު އުރީދޫ ކަލާރަން ދުވުމުގައި ސަރުކާރުގެ އިސް ވެރިންނާއި ދައުލަތުގެ އިސް މަޤާމުތަކުގައި ތިބި ފަރާތްތައް ބައިވެރިވުމާ ގުޅިގެން ޕީއެންސީ ޕާޓީގެ އެތެރޭގައި ބޮޑު ހަލަބޮލިކަމެއް އުފެދިއްޖެއެވެ. މި ނޫހަށް ލިބިފައިވާ މަޢުލޫމާތުން އެނގޭ ގޮތުގައި، ޕާޓީގެ ދާއިރާ ރައީސުންގެ ވަޓްސްއެޕް ގްރޫޕެއްގައި މިކަމާ ގުޅޭގޮތުން ހޫނު ބަހުސްތަކެއް ހިނގާފައިވެއެވެ.

ގްރޫޕްގެ ސްކްރީންޝޮޓްތަކުން ދައްކާގޮތުގައި، ގިނަ މެންބަރުން މި ދުވުމުގައި ސަރުކާރުގެ އިސްވެރިން ބައިވެރިވުމާމެދު ނުރުހުން ފާޅުކޮށްފައިވެއެވެ. ޚާއްޞަކޮށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) މި ދުވުމުގައި ބައިވެރިވުމާމެދު ގިނަ ސުވާލުތަކެއް އުފައްދާފައިވެއެވެ.

"މިއީވެސް ދައުލަތުން ކުރާ އިސްރާފުކަމަށާއި އަދި މީއީ ސަރުކާރުގެ ބޮޑުއް އަންބާ ކިޔާފައި މިހާ ފޯރިގައި ކުރަން ޖެހޭ ކަމެއްތޯ؟" މިފަދައިން މުޙައްމަދު ނައީމް ކިޔާ މެންބަރަކު ސުވާލު އުފައްދާފައިވެއެވެ. އަނެއްކޮޅުން،  ސަރުކާރަށް ސަނާ ކިޔާ ބައެއް މެންބަރުން ވަނީ ސަރުކާރުގެ ސިޔާސަތުތަކާމެދު ފާޑުކިޔާ މީހުން ގްރޫޕުން ބޭރުކޮށްލުމަށް ގޮވާލާފައެވެ. ނަމަވެސް ފާރިސް ކިޔާ މެންބަރަކު މިކަމާ ދެކޮޅު ހަދައި، "ބިރުން ބުނަން ޖެހޭ އެއްޗެއް ނުބުނެ ސަނާ ކިޔަނީ މަދުބައެއް" ކަމަށް ބުނެފައިވެއެވެ.

މި ބަހުސްގައި ބައެއް މެންބަރުން ފާހަގަކޮށްފައިވާ ގޮތުގައި، ސަރުކާރުގެ ސިޔާސަތުތަކުގެ ސަބަބުން ތަކެތީގެ އަގު މައްޗަށް ދިއުމާއި މަސްވެރިކަމުގެ ދާއިރާ އިނދަޖެހިފައިވާއިރު، މިފަދަ ދުވުންތަކުގައި ސަރުކާރުގެ އިސްވެރިން ބައިވެރިވުމަކީ ރައްޔިތުންގެ ހިތްތަކުގައި ނުރުހުން އުފެދޭނެ ކަމެކެވެ.