މަސްވެރިން ކިރުވި މަހަށް ދޭންޖެހޭ 62 މިލިއަން ރުފިޔާ ނުދެވި ލަސްވަނީ ދައުލަތުގެ މާލީހާލަތު ދައްވީމަ - މިނިސްޓަރ ޝިޔާމް

މަސްވެރިން  ކިރުވި މަހަށް ދޭންޖެހޭ 62 މިލިއަން ރުފިޔާ ނުދެވި ލަސްވަނީ ދައުލަތުގެ މާލީހާލަތު ދަށްވުމުން ކަމަށް މަސްވެރިކަމާ ބެހޭ މިނިސްޓަރު ޝިޔާމް ވިދާޅުވެއްޖެއެވެ. 

ސަރުކާރު ވެރިކަމަށް އައިއިރު ވެފައިވާ އެއް ވައުދަކީ 48 ގަޑިއިރު ތެރޭ މަސްވެރިންނަށް ފައިސާ ދޫކުރުމެވެ. އެހެންނަމަވެސް މަސްވެރިންނަށް ފައިސާ ދޫކުރުމުގައި ވަރަށް ބޮޑަށް ލަސްވެ މަސްވެރިން މިހާރުވެސް އަންނަނީ އެކަމުގެ ޝަކުވާތައް ކުރަމުންނެވެ. 

ޝިޔާމްގެ ބަހަނާއަކަށް މިހާރުވެސް އޮތީ ސަރުކާރާ ހަވާލުވީއިރުވެސް ދައުލަތުގެ މާލީ ހާލަތު ދަށްވެފައި އޮތުމެވެ. ވެރިކަމުގައި ހަ މަސް ހޭދަވީއިރުވެސް އެ ބަހަނާއިން ސަލާމަތް ނުވެވުނެވެ. އެއީ ބަހަނާއެއްކަން ހާމަވާ ސަބަބަކީ ވެރިކަމުގައި ސަރުކާރުގެ މަގާމުތަކަށް ކުރާ ހޭދަތައް ދުވަހަކަށްވުރެ ދުވަހެއް އިތުރުވަމުން ދިޔުމެވެ. 

"22 އޭޕްރިލްއާ ހަމައަށް ބޭނި މަހަށް ފައިސާ ދީފައިވާނީ، 23 އޭޕްރިލްއިން ފެށިގެން ބޭނި މަހަށް ފައިސާ ނުދެވި މިވަނީ، 62 މިލިއަން ރުފިޔާ މަސްވެރިންނަށް ނުދެވި އެބައޮތް،" ޝިޔާމް ވިދާޅުވިއެވެ. 

މިފްކޯއާއި ސަރުކާރުގެ މާލީ ހާލަތު ރަނގަޅުކުރުމަށް ފިނޭންސް މިނިސްޓްރީން މަސައްކަތް ކުރަމުންދާ ކަމަށް ޝިޔާމް ވިދާޅުވިއެވެ. ޝިޔާމް އެހެން ވިދާޅުވި ނަމަވެސް ސަރުކާރުން ހަރަދު ކުޑަ ކުރުމަށް އެއްވެސް މަސައްކަތެއް ކުރާތަނެއް ނުފެނެއެވެ. 

ސިޔާސީ މުވައްޒަފުންގެ އަދަދު 2000 އަށްވުރެ މައްޗަށް އެރިއިރު ސަރުކާރުން ޕްރޮޖެކްޓްތަކަށް ކުރާ ހޭދައަށް ވުރެ ބޮޑު ހަރަދެއް މުސާރަތަކަށް އަންނަނީ ކުރަމުންނެވެ.